ദില്ലി : പുതുവത്സരാഘോഷത്തിനിടെ അമേരിക്കയിലെ ന്യൂ ഓര്ലിയന്സില് നടന്ന ഭീകരാക്രമണത്തെ അപലപിച്ച് പ്രധാനമന്ത്രി നരേന്ദ്രമോദി. ഭീകരാക്രമണത്തെ ഭീരുത്വമെന്ന് വിശേഷിപ്പിച്ച പ്രധാനമന്ത്രി തങ്ങളുടെ ചിന്തകളും പ്രാര്ഥനകളും ആക്രമണത്തിന് ഇരയായവര്ക്കും അവരുടെ കുടുംബാംഗങ്ങള്ക്കും ഒപ്പമാണെന്നും പറഞ്ഞു. സമൂഹ മാദ്ധ്യമമായ എക്സിലൂടെയായിരുന്നു അദ്ദേഹത്തിന്റെ പ്രതികരണം .
We strongly condemn the cowardly terrorist attack in New Orleans. Our thoughts and prayers are with the victims and their families. May they find strength and solace as they heal from this tragedy.
— Narendra Modi (@narendramodi) January 2, 2025
വിനോദസഞ്ചാരകേന്ദ്രമായ ബര്ബണ് സ്ട്രീറ്റിനടുത്ത് പ്രാദേശികസമയം പുലര്ച്ചെ 3.15-നാണ് ആക്രമണം നടന്നത്. ആള്ക്കൂട്ടത്തിലേക്ക് അക്രമി പിക്ക് അപ്പ് ട്രക്ക് ഓടിച്ചുകയറ്റുകയായിരുന്നു. അമിത വേഗതയിലായിരുന്ന ഈ വാഹനം നിരവധി ആളുകളെ ഇടിച്ചിട്ടു. ശേഷം ഡ്രൈവര് ആള്ക്കൂട്ടത്തിലേക്ക് വെടിയുതിര്ക്കുകയും ചെയ്തു. സുരക്ഷ ഉദ്യോഗസ്ഥര് നടത്തിയ വെടിവെപ്പിലാണ് ഇയാള് കൊല്ലപ്പെട്ടത്. തുടര്ന്ന് നടത്തിയ പരിശോധനയില് ഐ.ഇ.ഡി. എന്നു സംശയിക്കുന്ന വസ്തു വാഹനത്തില്നിന്നു കണ്ടെടുത്തിരുന്നു. അമേരിക്കന് പൗരനും മുന് സൈനികനുമായ ഷംസുദ്ദീന് ജബ്ബാറാണ് വാടകയ്ക്കെടുത്ത ട്രക്ക് ആള്ക്കൂട്ടത്തിലേക്ക് ഇടിച്ചുകയറ്റിയത്. സംഭവം ഭീകരാക്രമണമാണെന്നാണ് എഫ്.ബി.ഐയുടെ കണ്ടെത്തല്. . അക്രമിയെ ഭീകരസംഘടനയായ ഇസ്ലാമിക് സ്റ്റേറ്റ്സ് = ആശയങ്ങള് സ്വാധീനിച്ചിരുന്നുവെന്ന് അമേരിക്കന് പ്രസിഡന്റ് ജോ ബൈഡനും സ്ഥിരീകരിച്ചു.
