പന്നുവിനെ വധിക്കാൻ ഗൂഢാലോചന നടത്തിയെന്ന് ആരോപണം ! മുൻ റോ ഏജന്റ് വികാസ് യാദവിനെതിരെ അറസ്റ്റ് വാറന്റ് പുറപ്പെടുവിച്ച് എഫ്ബിഐ

വാഷിങ്ടൻ : ഖലിസ്ഥാൻ ഭീകരനും വിഘടനവാദ സംഘടനയായ സിഖ് ഫോർ ജസ്റ്റിസ് തലവനുമായ ഗുർപട്‌വന്ത് സിങ് പന്നുവിനെ വധിക്കാൻ ഗൂഢാലോചന നടത്തിയ കേസിൽ മുൻ റോ ഏജന്റ് വികാസ് യാദവിനെതിരെ അറസ്റ്റ് വാറന്റ് പുറത്തിറക്കി അമേരിക്കൻ അന്വേഷണ ഏജൻസിയായ എഫ്ബിഐ. കൊലപാതകത്തിനായി ഗൂഢാലോചന, കള്ളപ്പണം വെളുപ്പിക്കൽ തുടങ്ങി മൂന്നു കുറ്റങ്ങളാണ് അമേരിക്കൻ നീതിന്യായ വകുപ്പ് വികാസ് യാദവിനെതിരെ ചുമത്തിയിരുരിക്കുന്നത്. കഴിഞ്ഞ വർഷം ജൂണിലാണു പന്നുവിനെ വധിക്കാൻ വികാസ് യാദവ് ഗൂഢാലോചന നടത്തിയതെന്നും എഫ്ബിഐയുടെ അറസ്റ്റ് വാറന്റിൽ പറയുന്നു.

അമേരിക്കൻ, കനേഡിയൻ പൗരത്വമുള്ള പന്നുവിനെ ഭീകരവാദിയായി ഇന്ത്യ പ്രഖ്യാപിച്ചിരുന്നു. ഇക്കഴിഞ്ഞ ജൂണിൽ ചെക്ക് റിപ്പബ്ലിക്കില്‍ അറസ്റ്റിലായ നിഖിൽ ഗുപ്തയെന്ന മറ്റൊരു ഇന്ത്യൻ പൗരൻ വഴി പന്നുവിനെ വധിക്കാൻ വികാസ് യാദവ് പദ്ധതി തയ്യാറാക്കിയെന്നാണ് അമേരിക്കൻ ഏജൻസിയുടെ ആരോപണം. നിഖിൽ ഗുപ്ത വഴി ഒരു ലക്ഷം ‍ഡോളർ പ്രതിഫലം വാഗ്ദാനം ചെയ്ത് അമേരിക്കയിലുള്ള വാടകക്കൊലയാളികള്‍ക്ക് ന്യൂയോർക്കിൽ വച്ച് പന്നുവിനെ വധിക്കാനുള്ള കരാർ നൽകിയെന്നാണ് കേസ്.

അതേസമയം വികാസ് യാദവിന് നിലവിൽ ‘റോ’യുമായി ബന്ധമില്ലെന്നാണ് ഇന്ത്യയുടെ വിശദീകരണം. ഒരു ഇന്ത്യൻ ഏജൻസിക്ക് വേണ്ടിയും ഇയാൾ പ്രവർത്തിക്കുന്നില്ലെന്നും വിദേശകാര്യ മന്ത്രാലയം കഴിഞ്ഞ ദിവസം നടത്തിയ വാർത്താ സമ്മേളനത്തിൽ വ്യക്തമാക്കിയിരുന്നു.