സ്പീക്കറുടെ പരാതിയിൽ വന്ദേ ഭാരത് ടിക്കറ്റ് എക്സാമിനറെ ചുമതലയിൽ നിന്ന് നീക്കിയ നടപടി പിൻവലിച്ചു ! നീതി ലഭിച്ചത് സ്പീക്കർക്കൊപ്പം സുഹൃത്ത് നടത്തിയ അനധികൃത യാത്ര ചോദ്യം ചെയ്ത ടിക്കറ്റ് എക്സാമിനർക്ക്

തിരുവനന്തപുരം: വന്ദേ ഭാരത് എക്‌സ്പ്രസിൽ സ്പീക്കർക്കൊപ്പം സുഹൃത്ത് നടത്തിയ അനധികൃത യാത്ര ചോദ്യം ചെയ്ത ടിക്കറ്റ് എക്സാമിനറെ ചുമതലയിൽ നിന്ന് നീക്കയ നടപടി പിൻവലിച്ചു. തന്റെ ഔദ്യോഗിക പദവിയെ ബഹുമാനിച്ചില്ലെന്ന സ്പീക്കർ എഎൻ ഷംസീറിൻ്റെ പരാതിയിലായിരുന്നു ടിക്കറ്റ് എക്സാമിനർക്കെതിരെ നേരത്തെ തിരുവനന്തപുരം റെയിൽവെ ഡിവിഷണൽ മാനേജർ നടപടിയെടുത്തത്. സംഭവത്തിൽ ചീഫ് ടിടിഇ ജി.എസ് പത്മകുമാറിനെ പിന്തുണച്ച് റെയിൽവെ ജീവനക്കാരുടെ സംഘടന എസ്ആർഎംയു രംഗത്ത് വന്നിരുന്നു

ഇക്കഴിഞ്ഞ വെള്ളിയാഴ്ച കാസർഗോഡ് നിന്ന് തിരുവനന്തപുരത്തേക്ക് വന്ന വന്ദേ ഭാരത് എക്‌സ്പ്രസിലാണ് സംഭവം. സ്പീക്കർ എഎൻ ഷംസീറിനൊപ്പം സുഹൃത്തായ ഗണേഷ് എന്നയാളും ട്രെയിനിൽ ഉണ്ടായിരുന്നുവെന്നാണ് വിവരം . ഇയാൾ ചെയർ കാർ ടിക്കറ്റാണ് എടുത്തിരുന്നത്. എക്സിക്യുട്ടീവ് കോച്ചിലായിരുന്നു ഷംസീറിന്റെ യാത്ര. എന്നാൽ ചെയർ കാർ ടിക്കറ്റെടുത്ത ഗണേഷും ഷംസീറിനൊപ്പം എക്സിക്യുട്ടീവ് കോച്ചിൽ യാത്ര ചെയ്തു. ഇതോടെ തൃശ്ശൂരിലെത്തിയപ്പോൾ ഗണേഷിനോട് ചെയർ കാറിലേക്ക് മാറാൻ ടിടിഇ നിർദ്ദേശിച്ചു. എന്നാൽ ഗണേഷ് തയ്യാറായില്ലെന്നാണ് ടിടിഇ ആരോപിക്കുന്നത്. എക്സിക്യുട്ടീവ് കോച്ചിലേക്ക് ടിക്കറ്റ് പുതുക്കിയെടുക്കാനും ഇയാൾ തയ്യാറായില്ല. കോട്ടയത്ത് എത്തിയപ്പോഴും ഗണേഷിനോട് കോച്ച് മാറാൻ ടിടിഇ ആവശ്യപ്പെട്ടു. ഇതോടെ ഗണേഷും ടിടിഇയും തമ്മിൽ വാക്കേറ്റമുണ്ടായി. ഇതിനിടെ ടിടിഇ രാഷ്ട്രീയം കളിക്കുകയാണെന്ന് ആരോപിച്ച് എഎൻ ഷംസീറും തർക്കത്തിൽ ഇടപെട്ടതായി പറയപ്പെടുന്നു. ട്രെയിൻ തിരുവനന്തപുരത്ത് എത്തിയപ്പോൾ ഡിവിഷണൽ മാനേജർക്ക് സ്പീക്ക‍ർ പരാതി നൽകി. തന്നോട് മോശമായി പെരുമാറിയെന്നാണ് പരാതിയിൽ സ്പീക്കർ ആരോപിച്ചത്. പിന്നാലെയാണ് പത്മകുമാറിനെ വന്ദേ ഭാരത് ചുമതലയിൽ നിന്ന് നീക്കിയത്.