നടൻ രജനികാന്ത് ആശുപത്രിയിൽ; പ്രാർത്ഥനയോടെ ആരാധകർ

ചെന്നൈ: നടന്‍ രജനികാന്ത് ആശുപത്രിയിൽ. ചെന്നൈ അപ്പോളോ ആശുപത്രിയിലാണ് നടനെ പ്രവേശിപ്പിച്ചത്. ഹൃദയസംബന്ധമായ ചികിത്സയ്ക്കായി തിങ്കളാഴ്ച അര്‍ധരാത്രിയോടെയാണ് അദ്ദേഹത്തെ ആശുപത്രിയില്‍ പ്രവേശിപ്പിച്ചത്. നിലവിൽ ആരോഗ്യനില തൃപ്തികരമാണെന്നാണ് വിവരം. എന്നാല്‍, ഇക്കാര്യം കുടുംബമോ ആശുപത്രി അധികൃതരോ ഔദ്യോഗികമായി സ്ഥിരീകരിച്ചിട്ടില്ല.

അതേസമയം, രജനികാന്തിനെ ആശുപത്രിയിയിൽ പ്രവേശിപ്പിച്ചു എന്ന വാര്‍ത്ത കാട്ടുതീ പോലെയാണ് സമൂഹമാദ്ധ്യമത്തില്‍ പ്രചരിക്കുന്നത്. സൂപ്പര്‍സ്റ്റാറിന് പ്രാര്‍ത്ഥനകളുമായി ഒട്ടേറെപ്പേരെത്തി. സ്ഥിരമായി ഉദരസംബന്ധമായ അസുഖങ്ങള്‍ രജനികാന്തിനെ അലട്ടുന്നുണ്ടായിരുന്നു, അതിന്‍റെ ഭാഗമായിട്ടാവാം ഇപ്പോള്‍ ആശുപത്രിയില്‍ പ്രവേശിപ്പിച്ചിരിക്കുന്നതെന്നാണ് ചിലര്‍ പറയുന്നത്. 73കാരനായ രജനികാന്തിന്‍റെ ആരോഗ്യവിവരങ്ങള്‍ സംബന്ധിച്ച ആശുപത്രിയുടെ പ്രതികരണത്തിനായുള്ള കാത്തിരിപ്പിലാണ് ആരാധകര്‍.