നടിയെ ആക്രമിച്ച കേസ്! പ്രതികളുടെ ശിക്ഷ മരവിപ്പിക്കണമെന്ന ഹർജി ഹൈക്കോടതി ഇടക്കാല ഉത്തരവിനായി മാറ്റി; പൾസർ സുനി കൊടും ക്രിമിനലെന്ന് പ്രൊസിക്യൂഷൻ

കൊച്ചി: നടിയെ ആക്രമിച്ച കേസിൽ വിചാരണ കോടതി വിധിച്ച ശിക്ഷ മരവിപ്പിക്കണമെന്ന പ്രതികളുടെ ആവശ്യത്തിന്മേലുള്ള ഹർജി ഹൈക്കോടതി ഇടക്കാല ഉത്തരവിനായി മാറ്റി. കേസിലെ ഒന്നാം പ്രതി പൾസർ സുനി ഉൾപ്പെടെയുള്ളവർ സമർപ്പിച്ച ഹർജികളിലാണ് കോടതി ഇരുഭാഗത്തിന്റെയും വിശദമായ വാദം കേട്ട ശേഷം വിധി പറയാനായി മാറ്റിവെച്ചത്. എന്നാൽ പ്രതികളുടെ ശിക്ഷ മരവിപ്പിക്കരുതെന്നും നടന്നത് അതീവ ഹീനമായ കുറ്റകൃത്യമാണെന്നും അതിജീവിത കോടതിയിൽ വാദിച്ചു. ഒന്നാം പ്രതി കുറ്റക്കാരനാണെന്ന് വിചാരണ കോടതി കൃത്യമായി കണ്ടെത്തിയിട്ടുള്ളതാണെന്നും ഈ ഘട്ടത്തിൽ ശിക്ഷ മരവിപ്പിച്ചാൽ അത് കുറ്റകൃത്യത്തിന്റെ ഗൗരവം കുറച്ചുകാണുന്നതിന് തുല്യമാകുമെന്നും അതിജീവിത കോടതിയെ ബോധിപ്പിച്ചു.

പ്രതികളുടെ ശിക്ഷ മരവിപ്പിക്കരുതെന്ന് പ്രൊസിക്യൂഷനും കോടതിയിൽ വിട്ടുവീഴ്ചയില്ലാത്ത നിലപാട് സ്വീകരിച്ചു. പ്രതികളുടെ ശിക്ഷ വർദ്ധിപ്പിക്കണമെന്ന സർക്കാരിന്റെ അപ്പീൽ നിലവിൽ കോടതിയുടെ പരിഗണനയിലാണെന്ന് പ്രൊസിക്യൂഷൻ ചൂണ്ടിക്കാട്ടി. ഒന്നാം പ്രതിയായ പൾസർ സുനി ഒരു കൊടും ക്രിമിനലാണെന്നും മുൻപ് തുടർച്ചയായി ജാമ്യാപേക്ഷകൾ നൽകി കോടതിയുടെ സമയം കളഞ്ഞതിന് ഇയാൾക്ക് കോടതി പിഴ ചുമത്തിയിട്ടുള്ളതാണെന്നും സർക്കാർ അഭിഭാഷകൻ വ്യക്തമാക്കി. സുപ്രീം കോടതി ജാമ്യം നൽകി പുറത്തിറങ്ങി ഒരു മാസം തികയുന്നതിന് മുൻപ് തന്നെ പ്രതി വീണ്ടും മറ്റൊരു കേസിൽ പ്രതിയായ ചരിത്രമുണ്ടെന്നും ഇയാൾ ഒരു സ്ഥിരം കുറ്റവാളിയാണെന്നും സർക്കാർ കോടതിയിൽ വാദിച്ചു. ഇരുപക്ഷത്തിന്റെയും വാദപ്രതിവാദങ്ങൾ പൂർത്തിയായതോടെയാണ് കേസ് ഇടക്കാല ഉത്തരവിനായി ഹൈക്കോടതി മാറ്റിവെച്ചത്.