നടിയെ ആക്രമിച്ച കേസ്; കാവ്യയുടെ മൊഴികളിൽ വൈരുധ്യം, വീണ്ടും ചോദ്യം ചെയ്‌തേക്കും

കൊച്ചി: നടിയെ ആക്രമിച്ച കേസിലെ അന്വേഷണ ഉദ്യോഗസ്ഥനെ വധിക്കാൻ ഗൂഢാലോചന നടത്തിയ കേസിൽ നടി കാവ്യാ മാധവനെ വീണ്ടും ചോദ്യം ചെയ്യും. ഇന്നലെ കാവ്യാമാധവനെ ചോദ്യം ചെയ്തിരുന്നു. ചോദ്യം ചെയ്യൽ നാലര മണിക്കൂർ നീണ്ടു. കാവ്യാ മാധവൻ നൽകിയ മൊഴി അന്വേഷണ സംഘം ഇന്ന് വിശദമായി പരിശോധിക്കും. കാവ്യാ മാധവന്‍റെ മൊഴികളിലെ ചില പഴുതുകളും പൊരുത്തക്കേടുകളും അന്വേഷണസംഘത്തിന്‍റെ ശ്രദ്ധയിൽപ്പെട്ടിട്ടുണ്ട്. അതിനാലാണ് വീണ്ടും ചോദ്യം ചെയ്യാൻ അന്വേഷണ സംഘം ആലോചിക്കുന്നത്.

ആക്രമിക്കപ്പെട്ട നടിയോട് പ്രതി ദിലീപിനും ഭാര്യ കാവ്യക്കും മുൻ വൈരാഗ്യമുണ്ടായിരുന്നോ? എങ്കിൽ അത് എന്തുകൊണ്ട് തുടങ്ങിയ കാര്യങ്ങളിലാണ് ഇനി വ്യക്തത തേടാനുള്ളത്. അതേസമയം, തുടരന്വേഷണത്തിന്‍റെ മുന്നോട്ടുളള പോക്കിൽ കാവ്യയുടെ മൊഴി നിർണായകമാണെങ്കിൽ മാത്രം വീണ്ടും ചോദ്യം ചെയ്താൽ മതിയെന്നാണ് ഉന്നത പോലീസുദ്യോഗസ്ഥരുടെ നിലപാട്.

സാക്ഷിയായത് കൊണ്ട് തന്നെ മൊഴിയെടുക്കാൻ വീട്ടിൽ എത്തണമെന്ന് കാവ്യാമാധവൻ അറിയിച്ചിരുന്നു. നടിയെ ആക്രമിച്ച കേസ് അന്വേഷണ മേധാവിമാരായ എസ് പി സുദർശനും ബൈജു പൗലോസും, അന്വേഷണ ഉദ്യോഗസ്ഥരെ വധിക്കാൻ ഗൂഢാലോചന നടത്തിയെന്ന കേസ് അന്വേഷണ മേധാവിയായ എസ് പി മോഹന ചന്ദ്രനുമാണ് ഒരുമിച്ച് ദിലീപിന്‍റെ വീട്ടിൽ എത്തിയത്.