‘കോൺഗ്രസ് നേതാക്കളെല്ലാം വഞ്ചകരും നുണയന്മാരുമാണ്; അവർക്ക് ആകെ അറിയാവുന്നത് മുദ്രാവാക്യം വിളിക്കാൻ മാത്രമാണ്’; പ്രധാനമന്ത്രിയുടെ നേതൃത്വത്തിൽ ആരംഭിച്ച വിവിധ പദ്ധതികൾ ഭാരതത്തെ വികസനത്തിലേക്ക് നയിക്കുകയാണെന്ന് പ്രഹ്ലാദ് ജോഷി

ഹുബ്ബള്ളി: കോൺഗ്രസ് നേതാക്കളെല്ലാം വഞ്ചകരും നുണയന്മാരാണെന്ന് കേന്ദ്രമന്ത്രി പ്രഹ്ലാദ് ജോഷി. അവർക്ക് മുദ്രാവാക്യം വിളിക്കാൻ മാത്രമാണ് അറിയാവുന്നത്. പ്രധാനമന്ത്രി നരേന്ദ്രമോദിയുടെ നേതൃത്വത്തിൽ ആരംഭിച്ച വിവിധ പദ്ധതികൾ രാജ്യത്തെ വികസനത്തിലേക്ക് നയിക്കുകയാണെന്നും അദ്ദേഹം ചൂണ്ടിക്കാട്ടി. കർണാടകയിലെ ഹുബ്ബള്ളിയിൽ നടന്ന ഒബിസി മോർച്ച യോഗത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

കോൺഗ്രസ് നേതാക്കളെല്ലാം വഞ്ചകരും നുണയന്മാരുമായി മാറിയിരിക്കുകയാണ്. മുദ്രാവാക്യം വിളിക്കാൻ മാത്രാണ് ഇവർക്ക് അറിയാവുന്നത്. പ്രധാനമന്ത്രി നരേന്ദ്രമോദി ഇന്ന് ജനങ്ങൾക്കായി വിവിധ പദ്ധതികൾ അവതരിപ്പിച്ചു. രാജ്യത്തിന്റെ വികസനം ലക്ഷ്യമിട്ട് മാത്രമാണ് അദ്ദേഹത്തിന്റെ ഓരോ പ്രവർത്തനവും. പ്രധാനമന്ത്രിയായി നരേന്ദ്രമോദി തന്നെ വീണ്ടും അധികാരത്തിലെത്തുമെന്നും മൂന്നാമത്തെ വലിയ സമ്പദ്വ്യവസ്ഥയായി ഭാരതം മാറുമെന്നും ഇന്ന് ലോകം മുഴുവൻ പറയുന്നുണ്ട്.

പ്രധാനമന്ത്രി കിസാൻ സമ്മാൻ, പ്രധാനമന്ത്രി മുദ്ര യോജന തുടങ്ങിയ പദ്ധതികൾ ജനങ്ങളെ സ്വയംപര്യാപ്തരാക്കുന്നതിന് വേണ്ടി വലിയ സംഭാവന നൽകിയിട്ടുണ്ട്. ഒബിസി, എസ്സി, എസ്ടി വിഭാഗങ്ങളിൽപ്പെട്ട 63 ശതമാനം ആളുകളും കിസാൻ സമ്മാൻ പദ്ധതിയുടെ ഗുണഭോക്താക്കളാണ്. ഒബിസി സംവരണ പരിധി 8 ലക്ഷത്തിൽ നിന്ന് 12 ലക്ഷമായി ഉയർത്തിയത് മോദി സർക്കാരാണ്. പ്രധാനമന്ത്രി മുദ്ര യോജനയ്‌ക്ക് കീഴിലുള്ള 35 കോടി ഗുണഭോക്താക്കളിൽ 50 ശതമാനത്തിലധികവും എസ്സി, എസ്ടി വിഭാഗക്കാരാണെന്നും പ്രഹ്ലാദ് ജോഷി വ്യക്തമാക്കി.