ശബരിമല: നടന് ദിലീപിന് ശബരിമല സന്നിധാനത്ത് വിഐപി പരിഗണന നൽകിയ സംഭവത്തിൽ ദേവസ്വം ബോര്ഡിനോട് കോടതി വിശദീകരണം തേടി. സന്നിധാനത്തെ സിസിടിവി ദൃശ്യങ്ങള് ഹാജരാക്കാനും കോടതി ആവശ്യപ്പെട്ടു. ഇന്നലെ രാത്രിയാണ് നടന് ദിലീപ് ശബരിമലയില് ദര്ശനം നടത്തിയത്. ദേവസ്വം ബോര്ഡിന്റെ ഉദ്യോഗസ്ഥര് ദിലീപിനെ അനുഗമിക്കുകയും ശ്രീകോവിലിന്റെ മുന്നിലെത്തിച്ച് ദര്ശനം നടത്തിപ്പോകാനുള്ള അവസരം ഒരുക്കിയെന്നുമാണ് ഉയരുന്ന ആരോപണം. ഇക്കാര്യം പരിശോധിക്കാനാണ് സന്നിധാനത്തെയും അപ്പര് തിരുമുറ്റത്തെയും സിസിടിവി ദൃശ്യങ്ങള് ഹാജരാക്കാന് കോടതി ആവശ്യപ്പെട്ടത്. ക്രമവിരുദ്ധമായി എന്തെങ്കിലും കണ്ടെത്തുന്നപക്ഷം നടപടിയുണ്ടാകും.
ശബരിമലയില് ആര്ക്കും പ്രത്യേക പരിഗണന നല്കരുതെന്ന് കോടതി നേരത്തെതന്നെ വ്യക്തമാക്കിയിട്ടുണ്ട്. അവിടെ എത്തുന്ന എല്ലാ ഭക്തരും സമന്മാരാണ്. എല്ലാവര്ക്കും വിര്ച്വല് ക്യൂ വഴിയാണ് അവിടെ ദര്ശനം അനുവദിക്കുന്നത്. അതുകൊണ്ട് ആ രീതിക്ക് കാര്യങ്ങള് നടക്കണമെന്നും കോടതി നേരത്തെ വ്യക്തമാക്കിയിരുന്നു.
