കൽപ്പറ്റ : കാലവർഷക്കെടുതി അതിരൂക്ഷമായി തുടരുന്ന വയനാട് ജില്ലയില് 91 ദുരിതാശ്വാസ ക്യാമ്പുകളിലായി 9328 പേരെ മാറ്റിതാമസിപ്പിച്ചു. വയനാടിനെ ഞെട്ടിച്ച ചൂരല്മല ദുരന്തത്തിന്റെ പശ്ചാത്തലത്തില് ആരംഭിച്ച 9 ക്യാമ്പുകള് ഉള്പ്പെടെയുള്ള കണക്കാണിത്. 2704 കുടുംബങ്ങളിലെ 3393 പുരുഷന്മാരും 3824 സ്ത്രീകളും 2090 കുട്ടികളും 21 ഗര്ഭിണികളുമാണ് വിവിധ ക്യാമ്പുകളില് കഴിയുന്നത്.
ഉരുൾപൊട്ടൽ ദുരന്തത്തിന്റെ പശ്ചാത്തലത്തില് ആരംഭിച്ച 9 ദുരിതാശ്വാസ ക്യാമ്പുകളിലായി 578 കുടുംബങ്ങളിലെ 2328 പേരെയാണ് മാറ്റി താമസിപ്പിച്ചിരിക്കുന്നത്. ഇവരിൽ 859 പുരുഷന്മാരും 903 സ്ത്രീകളും 564 കുട്ടികളും 2 ഗര്ഭിണികളും ഉൾപ്പെടുന്നു.
മേപ്പാടി ഗവ ഹയര്സെക്കന്ഡറി സ്കൂള്, കോട്ടനാട് ഗവ സ്കൂള്, മേപ്പാടി സെന്റ് ജോസഫ് യു.പി സ്കൂള്, നെല്ലിമുണ്ട അമ്പലം ഹാള്, കാപ്പുംക്കൊല്ലി ആരോമ ഇന്, മേപ്പാടി മൗണ്ട് ടാബോര് സ്കൂള്, മേപ്പാടി സെന്റ് ജോസഫ് ഗോള്സ് ഹൈസ്കൂള്, തൃക്കൈപ്പറ്റ ഗവ ഹൈസ്കൂള്, മേപ്പാടി ജി.എല്.പി സ്കൂളുകളിലാണ് ക്യാമ്പുകള് പ്രവര്ത്തിക്കുന്നത്. ദുരിതാശ്വാസ ക്യാമ്പുകളിലേക്ക് ആവശ്യമായിട്ടുള്ള അവശ്യ വസ്തുക്കള് ബന്ധപ്പെട്ട വകുപ്പുകള് ഉറപ്പാക്കുന്നുണ്ട്. റേഷന് കടകളിലും സപ്ലൈകോ വില്പനശാലകളിലും ഭക്ഷ്യധാന്യങ്ങളുടെ ലഭ്യത ഉറപ്പാക്കിയിട്ടുണ്ട്.
