അൽഖ്വയ്ദ ഭീകരരുമായി അടുത്തബന്ധം; വിദ്യാർത്ഥി, യുവജന സംഘടനകളും എൻഐഎ അന്വേഷണ പരിധിയിൽ

വിദ്യാർത്ഥി, യുവജന സംഘടനകളും എൻഐഎ അന്വേഷണ പരിധിയിൽ. അൽഖ്വയ്ദ ഭീകരർ ചില വിദ്യാർത്ഥി യുവജന സംഘടനകളുമായി അടുത്ത് ബന്ധപ്പെട്ടിരുന്നതായി എൻഐഎയുടെ കണ്ടെത്തതിയതിന്‍റെ പശ്ചാത്തലത്തിലാണ് അന്വേഷണം.

കൊച്ചി നഗരത്തിൽ നടന്ന ചില അക്രമാസക്തമായ സമരങ്ങളുടെ ആസൂത്രണത്തിൽ മൊഷറഫ് ഹുസൈൻ പങ്കെടുത്തിരുന്നെന്ന് വെളിപ്പെടുത്തിയിരുന്നു. കൊച്ചിയിൽ അറസ്റ്റിലായ മൊഷറഫ് ഹുസൈനനിൽ നിന്നും ഇക്കാര്യത്തിൽ ലഭിച്ച മൊഴിയുടെ അടിസ്ഥാനത്തിലാണ് എൻഐഎയുടെ ഇപ്പോഴത്തെ അന്വേഷണം. ചില വിദ്യാർത്ഥി യുവജന സംഘടനകൾക്ക് ഭീകര ബന്ധം ഉണ്ടെന്ന വിവരവും ഇതോടൊപ്പം എൻഐഎ പരിശോധിക്കുകയാണ്. സാമ്പത്തിക സഹായമടക്കം ഇത്തരം വിദ്യാർത്ഥി സംഘടനകൾക്ക് ലഭിച്ചിരുന്നെന്നും മൊഷറഫ് ഹുസൈൻ അന്വേഷണസംഘത്തോട് വെളിപ്പെടുത്തിയിട്ടുണ്ട്.

അതേസമയം, മൊഷറഫ് ഹുസൈന് ഒന്നിലധികം ബാങ്ക് അക്കൗണ്ടുകൾ ഉണ്ടായിരുന്നുവെന്നും എന്നാൽ ചില ബാങ്ക് അക്കൗണ്ടുകളുടെ നിയന്ത്രണം മൊഷറഫ് ഹുസൈൻറെ പക്കൽ അല്ലായിരുന്നുവെന്നും അന്വേഷണ സംഘം ഇതിനോടകം തന്നെ കണ്ടെത്തിയിട്ടുണ്ട്.