മുംബൈ ലഹരിവേട്ട: നടി അനന്യയെ 2 മണിക്കൂർ ചോദ്യംചെയ്ത് എൻസിബി; നിർണായക വിവരങ്ങൾ ലഭിച്ചതായി സൂചന

മുംബൈ: ആഡംബരക്കപ്പലിലെ ലഹരിപ്പാർട്ടിയുമായി ബന്ധപ്പെട്ട് നടി അനന്യ പാണ്ഡെയെ എന്‍.സി.ബി (NCB) ചോദ്യം ചെയ്തു. നർക്കോട്ടിക് കൺട്രോൾ ബ്യൂറോ (എൻസിബി) സോണൽ ഓഫിസർ സമീർ വാങ്കഡെയാണ് അനന്യയെ ചോദ്യം ചെയ്തത്. രണ്ടുമണിക്കൂര്‍ നേരത്തെ ചോദ്യം ചെയ്യലിനു ശേഷമാണ് അനന്യയെ വിട്ടയച്ചത്. നാളെ രാവിലെ 11ന് വീണ്ടും ചോദ്യം ചെയ്യലിന് വിളിപ്പിച്ചിട്ടുണ്ട്.

ലഹരി ഉപയോഗവുമായി ബന്ധപ്പെട്ട് ആര്യൻ ഖാൻ അനന്യയ്ക്ക് വാട്ട്സ്ആപ്പ് സന്ദേശം അയച്ചിരുന്നു എന്നാണ് ലഭിക്കുന്ന സൂചന. ഇതുമായി ബന്ധപ്പെട്ട രേഖകള്‍ എന്‍.സി.ബി കഴിഞ്ഞ ദിവസം കോടതിയില്‍ സമര്‍പ്പിച്ചിരുന്നു. ആര്യന്റെയും സഹോദരി സുഹാനയുടെയും പൊതുസുഹൃത്താണ് 22കാരിയായ അനന്യ. ഇന്ന് നടിയുടെ വീട്ടില്‍ എന്‍.സി.ബി റെയ്ഡും നടന്നിരുന്നു. ഫോണും ലാപ്‌ടോപ്പും എൻ.സി.ബി പിടിച്ചെടുക്കുകയും ചെയ്തു. ഇതിനു പിന്നാലെയാണ് ചോദ്യം ചെയ്യലിനായി എന്‍.സി.ബി ഓഫീസിനെത്താന്‍ സമന്‍സ് അയച്ചത്.