കത്ത് വിവാദത്തിൽ ആര്യയും ആനാവൂരും കുടുങ്ങുമോ?? മേയറുടെയും സിപിഐഎം ജില്ലാ സെക്രട്ടറിയുടെയും മൊഴി എടുത്ത് വിജിലൻസ്

തിരുവനന്തപുരം: തലസ്ഥാനത്തെ കോർപ്പറേഷനിലെ കത്ത് വിവാദത്തിൽ സിപിഐഎം തിരുവനന്തപുരം ജില്ലാ സെക്രട്ടറി ആനാവൂർ നാഗപ്പന്റെയും മേയർ ആര്യാ രാജേന്ദ്രന്റെയും മൊഴി രേഖപ്പെടുത്തി വിജിലൻസ്. കത്ത് നൽകിയിട്ടില്ലെന്നാണ് ആര്യ നൽകിയിരിക്കുന്ന മൊഴി.

വീട്ടിൽ വെച്ചാണ് മേയറുടെ മൊഴി രേഖപ്പെടുത്തിയത്. കത്തിനെ കുറിച്ച് അറിയില്ലെന്നും കോർപ്പറേഷനിലെ നിയമനങ്ങളിൽ ഇടപടാറില്ലെന്നുമാണ് ആനാവൂരും മൊഴി നൽകി. ക്രൈംബ്രാഞ്ചിന് പിന്നാലെയാണ് വിജിലൻസും വിവാദ കത്തിൽ അന്വേഷണം നടത്തുന്നത്. പരാതി നൽകിയ കോൺഗ്രസ് നേതാവും മുൻ കൗൺസിലറുമായ ശ്രീകുമാറിൽ നിന്നും വിജിലൻസ് രാവിലെ മൊഴി നൽകിയിരുന്നു.

ഇന്നലെയാണ് കത്ത് വിവാദത്തില്‍ പ്രാഥമിക അന്വേഷണം നടത്താന്‍ വിജിലന്‍സ് മേധാവി നിര്‍ദേശം നല്‍കിയത്. തിരുവനന്തപുരം വിജിലന്‍സ് യൂണിറ്റ് ഒന്ന് വിവരശേഖരണം ആരംഭിച്ചിരുന്നു.