പാലക്കാട്: അട്ടപ്പാടി മധു കൊലക്കേസിൽ വീണ്ടും കൂറുമാറ്റം തുടരുന്നു. 42-ാം സാക്ഷിയായ നവാസാണ് വിചാരണക്കോടതിയിൽ മൊഴി മാറ്റി പറഞ്ഞത് .
പ്രതികളെ തിരിച്ചറിയാൻ കഴിയുന്നില്ലെന്നും പോലീസിന് മൊഴി നൽകിയിട്ടില്ലെന്നും നവാസ് പറഞ്ഞു. മധുവധക്കേസിൽ കൂറുമാറിയവരുടെ എണ്ണം ഇതോടെ 26 ആയി.
ഈ കഴിഞ്ഞ ആഴ്ച്ച കേസ് പരിഗണിക്കവെ 55-ാം സാക്ഷിയായ ബിനു മൊഴി മാറ്റിയിരുന്നു.കേസിലെ രണ്ട് പ്രതികളുടെ സഹോദരനായിരുന്നു കൂറുമാറിയ ബിനു. കേസുമായി ബന്ധപ്പെട്ട് തയ്യറാക്കിയ മഹസറിൽ ബിനു ഒപ്പിട്ടിരുന്നു. എന്നാൽ ഈ ഒപ്പ് തന്റെ അല്ലെന്നും താൻ ഒപ്പ് വെച്ചിട്ടില്ലെന്നും ബിനു കോടതിയിൽ പറഞ്ഞു.
കഴിഞ്ഞ ദിവസം കേസ് പരിഗണിക്കവെ രണ്ട് സാക്ഷികൾ പ്രോസിക്യൂഷന് അനുകൂലമായി മൊഴി നൽകിയിരുന്നു. 85-ാം സാക്ഷിയായ സി. സുമേഷ്, 91-ാം സാക്ഷിയായ നിജാമുദ്ദീൻ എന്നിവരാണ് അനുകൂല മൊഴി നൽകിയത്.
