സ്വാതി മലിവാൾ എംപിയെ മർദിച്ചെന്ന പരാതി ! അരവിന്ദ് കേജ്‌രിവാളിന്റെ പിഎ ബൈഭവ് കുമാര്‍ അറസ്റ്റിൽ ! ഒളിവിലായിരുന്ന പ്രതി അറസ്റ്റിലായത് കേജ്‌രിവാളിന്റെ വീട്ടിൽ നിന്ന് !

സ്വാതി മലിവാൾ എംപിയെ മർദിച്ചെന്ന പരാതിയിൽ ദില്ലി മുഖ്യമന്ത്രി അരവിന്ദ് കേജ്‌രിവാളിന്റെ പിഎ ബിഭവ് കുമാര്‍ അറസ്റ്റിലായി. ആരോപണം പുറത്ത് വന്നതോടെ ഒളിവിലായിരുന്ന ബൈഭവിനെ കേജ്‌രിവാളിന്റെ വീട്ടിൽനിന്നാണ് ദില്ലി പോലീസ് അറസ്റ്റ് ചെയ്തത്.

നേരത്തെ തന്നെ കേജ്‌രിവാൾ ബൈഭവിനെ സംരക്ഷിക്കുന്നുവെന്ന് ആരോപണമുയർന്നിരുന്നു. അതിനിടെയാണ് സിവിൽ ലൈനിലെ മുഖ്യമന്ത്രിയുടെ ഔദ്യോഗിക വസതിയിൽനിന്ന് ബൈഭവ് പിടിയിലാകുന്നത്. സിവിൽ ലൈൻ പോലീസ് സ്റ്റേഷനിലാണ് നിലവിൽ ബൈഭവിനെ എത്തിച്ചിരിക്കുന്നത്. ലക്നൗവിൽ നടക്കുന്ന ഇൻഡി മുന്നണിയുടെ വാർത്താസമ്മേളനത്തിൽ പങ്കെടുക്കാൻ കേജ്‌രിവാളിനും സഞ്ജയ് സിങ് എംപിക്കുമൊപ്പം തിരിച്ച ബൈഭവ് ഒളിവിൽ പോവുകയായിരുന്നു. ഇയാളെ കണ്ടെത്താനായി നാല് സംഘങ്ങളായി തിരിഞ്ഞ് പൊലീസ് പഞ്ചാബിൽ തിരച്ചിൽ നടത്തുന്നതിനിടെ ലഭിച്ച സൂചനയെത്തുടർന്നാണ് കേജ്‌രിവാളിന്റെ വീട്ടിൽ പരിശോധന നടത്തിയത്. വീട്ടിൽത്തന്നെയുള്ള ഓഫിസ് മുറിയിൽ ബൈഭവ് ഒളിവിൽ കഴിയുന്നുവെന്നായിരുന്നു വിവരം. തുടർന്ന് വൻ പൊലീസ് സംഘം സ്ഥലത്തെത്തി ബൈഭവിനെ കസ്റ്റഡിയിലെടുക്കുകയായിരുന്നു.

ബൈഭവ് കുമാര്‍ മര്‍ദ്ദിച്ചുവെന്ന എഎപി എംപി സ്വാതി മലിവാളിന്‍റെ പരാതിയിൽ സ്വാതിയെ കെജ്‌രിവാളിന്റെ വീട്ടിലെത്തിച്ച് കഴിഞ്ഞ ദിവസം അന്വേഷണ സംഘം തെളിവെടുത്തിരുന്നു. കഴിഞ്ഞ തിങ്കളാഴ്ച രാത്രി കെജ്‌രിവാളിനെ കാണാൻ വസതിയിലെത്തിയപ്പോള്‍ അതിക്രൂരമായി ബൈഭവ് കുമാര്‍ തന്നെ മര്‍ദ്ദിച്ചുവെന്നാണ് സ്വാതിയുടെ മൊഴി.

“ഏഴ് തവണ കരണത്തടിച്ചു, മുടി ചുറ്റിപ്പിടിച്ച് ഇടിച്ചു, നെഞ്ചിലും, ഇടുപ്പിലും, വയറ്റിലും ചവിട്ടി, കെജ്‌രിവാളിന്റെ വീട്ടിലെ മുറിക്കുള്ളില്‍ വലിച്ചിഴച്ചു മറ്റ് ജീവനക്കാരെത്തിയാണ് തന്നെ രക്ഷിച്ചത്, അടുത്ത മുറിയിലുണ്ടായിരുന്ന കെജ്‌രിവാളും ഇതെല്ലാം അറിഞ്ഞിരിക്കാം, താൻ അവിടെ ഏറെ നേരം ഇരുന്ന് കരഞ്ഞു” – എന്നും സ്വാതിയുടെ മൊഴിയിലുണ്ട്. എഫ്ഐആറിലും ഇക്കാര്യങ്ങളാണ് വ്യക്തമാക്കുന്നത്.

മാത്രമല്ല സ്വാതിയുടെ മെഡിക്കൽ റിപ്പോർട്ടിൽ ഇടതുകാലിനും വലതു കണ്ണിന് താഴെയും താടിയിലും കവിളിലും പരുക്കുണ്ടെന്നാണ് വ്യക്തമാകുന്നത്. ദില്ലി എയിംസിലാണ് മെഡിക്കൽ പരിശോധന നടന്നത്.

സംഭവത്തിൽ ബൈഭവ് സംരക്ഷിക്കുന്ന തരത്തിലും സ്വാതിയെ തള്ളിപ്പറയുന്ന തരത്തിലുമാണ് ആം ആദ്മി പാർട്ടി നിലപാടെടുത്തത്. സ്വാതിയുടെ ആരോപണത്തിന് പിന്നിൽ ബിജെപി ആണെന്നായിരുന്നു ആം ആദ്മി പാർട്ടിയുടെ പ്രതികരണം. പരാതി ബിജെപി ഗൂഢാലോചനയെന്ന് ദില്ലി മന്ത്രി അതിഷി മാദ്ധ്യമങ്ങൾക്ക് മുന്നിൽ പറയുകയും ചെയ്തു. ഇതിനെതിരെ സ്വാതി മുന്നോട്ട് വന്നിരുന്നു. ഒരു ഗുണ്ടയെ രക്ഷിക്കാൻ തന്റെ വ്യക്തിത്വത്തെ ചോദ്യം ചെയ്യുകയാണ് അതിഷി ചെയ്യുന്നതെന്നാണ് സ്വാതി മലിവാൾ എക്‌സിൽ കുറിച്ചത്.