ദില്ലി : ദക്ഷിണകൊറിയിലെ ഗുമിയില് ഇന്നാരംഭിച്ച ഏഷ്യന് അത്ലറ്റിക് ചാമ്പ്യന്ഷിപ്പില് ഇന്ത്യക്ക് ആദ്യ സ്വര്ണം. പുരുഷന്മാരുടെ 10,000 മീറ്ററില് യുപി താരം ഗുല്വീര് സിങാണ് ഒന്നാം സ്ഥാനത്ത് ഫിനിഷ് ചെയ്തത്. 1975-ല് ഹരി ചന്ദും 2017-ല് ജി.ലക്ഷ്മണനും ഇതിന് മുമ്പ് 10,000 മീറ്ററില് സ്വര്ണം നേടിയിരുന്നു.
അവസാന ലാപ്പില് ബഹ്റൈനിന്റെ ആല്ബര്ട്ട് കിബിച്ചി റോപ്പറിനെ മറികടന്ന് അദ്ദേഹം മുന്നേറി. ഏഷ്യന് ചാമ്പ്യന്ഷിപ്പില് ഗുല്വീറിന്റെ രണ്ടാം മെഡല്നേട്ടമാണിത്. 2023-ല് 5,000 മീറ്ററില് വെങ്കലം നേടിയിരുന്നു. ഇത്തവണയും അയ്യായിരം മീറ്ററില് ഗുല്വീര് പങ്കെടുക്കുന്നുണ്ട്.
അഞ്ചുദിവസം നീണ്ടുനില്ക്കുന്ന ചാമ്പ്യന്ഷിപ്പില് 59 അംഗ ഇന്ത്യന് സംഘമാണ് പങ്കെടുക്കുന്നത്. ജാവലിന് ത്രോയിലെ ഒളിമ്പിക് ഇരട്ട മെഡല് ജേതാവ് നീരജ് ചോപ്ര ഒഴികെയുള്ള പ്രധാന താരങ്ങളെല്ലാം ഇന്ത്യക്കായി മത്സരിക്കാനിറങ്ങുന്നുണ്ട്.
