മറയൂരില്‍ വീണ്ടും പടയപ്പയിറങ്ങി; കൃഷി നശിപ്പിച്ചു, ഭീതിയിൽ ജനങ്ങൾ!

ഇടുക്കി: മറയൂരില്‍ വീണ്ടും പടയപ്പയിറങ്ങി കൃഷി നശിപ്പിച്ചു. ചട്ടമൂന്നാറിലെ ജനവാസമേഖലയിലാണ് കഴിഞ്ഞ ദിവസം രാത്രി ആനയിറങ്ങിയത്. കഴിഞ്ഞ ഒരാഴ്ചയായി ചട്ടമൂന്നാറിലും പാമ്പന്‍മലയിലുമായി പടയപ്പ നിലയുറപ്പിച്ചിരിക്കുകയാണ്. തോട്ടങ്ങളില്‍ പകല്‍ ജോലിക്ക് പോകുമ്പോഴും ആനയെ കാണുന്നത് പതിവാണെന്ന് തൊഴിലാളികള്‍ പറയുന്നു. പൊതുവെ അക്രമകാരിയല്ലെങ്കിലും ജനവാസമേഖലയില്‍ നിലയുറപ്പിച്ച് നില്‍ക്കുന്നതിനാല്‍ ആളുകള്‍ ഭീതിയിലാണ്.

അതേസമയം, അട്ടപ്പാടി നരസിമുക്കിലും കാട്ടാനക്കൂട്ടമിറങ്ങി. കുട്ടികളുള്‍പ്പടെ ആറ് ആനകളാണ് ജനവാസ മേഖലയില്‍ ഭീതി പടര്‍ത്തുന്നത്. ഗൂളിക്കടവ്, നരസിമുക്ക്, അഗളി മേഖലയിൽ കഴിഞ്ഞ ദിവസം ആനക്കൂട്ടം വ്യാപക കൃഷിനാശം വരുത്തിയിരുന്നു. വനപാലക സംഘം സ്ഥലത്തെത്തി മുക്കാൽ മണിക്കൂറിലധികം നീണ്ട പരിശ്രമത്തിനൊടുവിലാണ് ആനക്കൂട്ടത്തെ കാട് കയറ്റാനായത്. കഴിഞ്ഞ മൂന്ന് ദിവസത്തിനിടെ ആനക്കൂട്ടം എട്ട് ലക്ഷത്തിലധികം രൂപയുടെ കൃഷി നാശമുണ്ടാക്കിയെന്നാണ് കണക്ക്.