വീണ്ടും അയ്യപ്പ സ്നേഹവുമായി ഇ പി ജയരാജന്‍, ‘ശബരിമല’ ഇടതുമുന്നണിക്ക് അനുകൂലമാകുമെന്ന് കരുതുന്നുവെന്നും പരാമര്‍ശം

തിരുവനന്തപുരം: ഉപതെരഞ്ഞെടുപ്പുകളിൽ ഭഗവാൻ ശ്രീ അയ്യപ്പൻ തുണയ്ക്കുമെന്ന് വ്യവസായ മന്ത്രി ഇ.പി ജയരാജൻ. മരടിൽ കോടതി പറഞ്ഞതു പോലെ ചെയ്യേണ്ടി വന്നു. അതു പോലെയാണ് ശബരിമല സ്ത്രീ പ്രവേശന വിഷയത്തിലും സർക്കാർ ചെയ്തതെന്നും ഇ പി ജയരാജൻ പറഞ്ഞു..

ജി സുധാകരൻ മലയാള സാഹിത്യത്തിന് ചേരാത്ത ഒന്നും പറഞ്ഞിട്ടില്ല. വേഷംകെട്ടി വരുന്നവരെയാണ് പൂതന എന്ന് പറയുന്നത്. പുരാണങ്ങളിലുള്ളത് മന്ത്രി ജി സുധാകരന്‍ ഓര്‍മിപ്പിച്ചതാണ്. മാനസികവിഭ്രാന്തി കൊണ്ടാണ് യുഡിഎഫ് നേതാക്കള്‍ ഇതുപോലുളള നിസാരമായ ആരോപണങ്ങള്‍ ഉന്നയിക്കുന്നതെന്നും ഇ പി ജയരാജൻ പറഞ്ഞു. ജി. സുധാകരന്‍റെ വിവാദ പ്രസ്താവനയെ കുറിച്ചുള്ള മാധ്യമപ്രവർത്തകരുടെ ചോദ്യത്തോട് പ്രതികരിക്കുകയായിരുന്നു മന്ത്രി.

വോട്ടുകച്ചവടം നടത്തിയ പാരമ്പര്യം ഉളളതുകൊണ്ടാണ് മുല്ലപ്പളളി രാമചന്ദ്രന്‍ വോട്ടുമറിക്കല്‍ ആരോപണം ഉന്നയിക്കുന്നതെന്നും ഇ പി ജയരാജന്‍ പ്രതികരിച്ചു.