രാം ചരണിനും ഭാര്യ ഉപാസനയ്ക്കുമെതിരേ മോശം പരാമർശം; യുവാവിനെ കൈകാര്യം ചെയ്ത് നടന്റെ ആരാധകർ

തെലുങ്ക് സൂപ്പർ സ്റ്റാർ രാംചരണിനും ഭാര്യ ഉപാസയ്ക്കുമെതിരെ മോശം പരാമർശം നടത്തിയെന്നാരോപിച്ച് യുവാവിന് നേരേ ആക്രമണം. സുനിഷ്ട് എന്ന യുവാവിനെയാണ് രാംചരണിന്റെ ആരാധകര്‍ കൈകാര്യം ചെയ്തത്. ദൃശ്യങ്ങള്‍ സാമൂഹ മാദ്ധ്യമങ്ങളില്‍ അതിവേഗം ഷെയർ ചെയ്യപ്പെടുകയാണ്.

രാംചരണിന്റെ സുഹൃത്തെന്ന് അവകാശപ്പെട്ടുകൊണ്ട് ഒരു മാദ്ധ്യമത്തിന് നല്‍കിയ അഭിമുഖത്തിനിടെയാണ് സുനിഷ്ട് മോശം പരാമര്‍ശം നടത്തിയത്. “ഉപാസന എന്റെ സുഹൃത്താണ്. രാംചരണും അതെ. ഉപാസനയ്ക്ക് ഓഡി ഇലക്ടിക് കാറുണ്ട്. അതില്‍ ഞങ്ങള്‍ ഗോവയിലേക്ക് പോയിരുന്നു. ഒരിക്കല്‍ രാം ചരണ്‍ എന്നോട് വെറുതെ ചോദിച്ചു, ഉപാസനയെ പ്രണയത്തില്‍ വീഴ്ത്താമോ എന്ന്” ഇതായിരുന്നു സുനിഷ്ട് പറഞ്ഞത് – ഈ ദൃശ്യങ്ങള്‍ പ്രചരിച്ചതോടെയാണ് രാംചരണിന്റെ ആരാധകർ ഇയാളെ കായികപരമായി നേരിട്ടത്.

രാംചരണിനോടും ഉപാസനയോടും മാപ്പ് പറയണമെന്നാവശ്യപ്പെട്ടാണ് ആരാധകരുടെ മർദ്ദനം . ഈ ദൃശ്യങ്ങള്‍ പ്രചരിച്ചതോടെ ഒട്ടേറെപേര്‍ പ്രതികരണവുമായി രംഗത്ത് വന്നു. ഒരാള്‍ മറ്റൊരാളെ അധിക്ഷേപിച്ചാല്‍ നിയമപരമായി നടപടികള്‍ സ്വീകരിക്കാമെന്നും നിയമം കയ്യിലെടുക്കുന്നത് വലിയ തെറ്റാണെന്നുമാണ് കൂടുതൽ പേരും അഭിപ്രായപ്പെടുന്നത്.