തമിഴ്‌നാട്ടില്‍ നിന്നും മായം കലര്‍ന്ന വെളിച്ചെണ്ണ കേരളത്തിലേക്ക് ഒഴുകുന്നു

കോഴിക്കോട്: തമിഴ്നാട്ടില്‍ നിന്നും മായം ചേര്‍ത്ത വെളിച്ചെണ്ണ വിവിധ ബ്രാന്‍ഡുകളില്‍ കേരളത്തിലേക്കൊഴുകുന്നു . ഗുണനിലവാരം കുറഞ്ഞ വെളിച്ചെണ്ണ ഭക്ഷ്യസുരക്ഷാ വകുപ്പ് നിരോധിക്കുമ്പോള്‍ വിവിധ പേരുകളില്‍ പുറത്തിറക്കുകയാണ് കമ്പനി ഉടമകള്‍.തമിഴ്നാട്ടില് നിന്നുള്ള ഒരു കമ്പനിയുടെ മാത്രം വരുന്ന നാല് വെളിച്ചെണ്ണ ബ്രാന്‍ഡുകളാണ് മൂന്ന് മാസത്തിനുള്ളില്‍ അധികൃതര്‍ നിരോധിച്ചത്.

ഗുണനിലവാരം കുറഞ്ഞ സൂര്യ, ആയില്യം എന്നീ വെളിച്ചെണ്ണ ബ്രാന്‍ഡുകള്‍ കഴിഞ്ഞയാഴ്ച നിരോധിച്ചിരുന്നു. ഇവ രണ്ടും നിര്‍മ്മിക്കുന്നത് തമിഴ്നാട്ടിലെ തിരുപ്പൂരില്‍ നിന്നുള്ള കമ്പനിയാണ്. ഇതേ കമ്പനിയുടെ സൗഭാഗ്യ, സുരഭി എന്നീ വെളിച്ചെണ്ണ ബ്രാന്‍ഡുകള്‍ക്കാണ് മൂന്ന് മാസം മുമ്പ് നിരോധനം ഏര്‍പ്പെടുത്തിയത് .

അധികൃതരുടെ പിടിവീണതോടെ കമ്പനി പുതിയ പേരില്‍ മായം ചേര്‍ത്ത വെളിച്ചെണ്ണ കേരളത്തിലേക്ക് കടത്തുകയായിരുന്നു. കഴിഞ്ഞ രണ്ട് വര്‍ഷത്തിനിടയില്‍ നൂറിലധികം വെളിച്ചെണ്ണ ബ്രാന്‍ഡുകളാണ് കേരളത്തില്‍ നിരോധിച്ചത് .