അടിത്തറ വോട്ടുകൾ ഒലിച്ചുപോയി; ലോക്‌സഭാ തെരഞ്ഞെടുപ്പ് തോൽവി അസാധാരണമെന്ന് വിലയിരുത്തി സിപിഎം; തിരുവനന്തപുരത്ത് പാർട്ടിയിൽ പൊട്ടിത്തെറി; കരമന ഹരി പാർട്ടിവിട്ടേയ്ക്കും

തിരുവനന്തപുരം: ലോക്‌സഭാ തെരഞ്ഞെടുപ്പിലെ തോൽവി അസാധാരണമെന്നും അടിത്തറ വോട്ടുകൾ ബിജെപിയിലേക്ക് കുത്തിയൊലിച്ചു പോയെന്നും വിലയിരുത്തി സിപിഎം. ഒരു സ്വാധീനവുമില്ലാത്ത മേഖലകളിൽ പോലും ബിജെപി വോട്ടുയർത്തി. ബൂത്തിലിരിക്കാൻ ആളില്ലാതിരുന്ന സ്ഥലത്ത് പോലും ബിജെപിക്ക് മുന്നേറാൻ സാധിച്ചു. മുഖ്യമന്ത്രി പിണറായി വിജയൻറെ മണ്ഡലത്തിലടക്കം പാർട്ടി ഗ്രാമങ്ങളിൽ ബിജെപി കടന്നു കയറിയെന്നും ബിജെപിയുടെ വളർച്ച തടയാനുള്ള നടപടികൾ വേണമെന്നുമാണ് പാർട്ടി വിലയിരുത്തുന്നത്. അതേസമയം തെരഞ്ഞെടുപ്പ് ഫലങ്ങൾ വിലയിരുത്തിക്കൊണ്ടുള്ള പാർട്ടിയുടെ മേഖലാ യോഗങ്ങൾക്ക് ഇന്ന് തുടക്കമാകും.

ജില്ലാ കമ്മിറ്റി യോഗങ്ങളിൽ പിണറായി വിജയനെതിരെ വലിയ വിമർശനമാണ് ഉയർന്നത്. അതിൽ തിരുവനന്തപുരം ജില്ലാ കമ്മിറ്റിയാണ് അതിരൂക്ഷമായ വിമർശനം ഉയർത്തിയത്. തലസ്ഥാനത്തെ ഒരു മുതലാളിക്ക് മുഖ്യമന്ത്രിയുടെ അടുക്കള വരെ സ്വാധീനമുണ്ടെന്ന് ജില്ലാ കമ്മിറ്റിയംഗം കരമന ഹരി ആരോപിച്ചിരുന്നു. മേയർ ആര്യാ രാജേന്ദ്രനും ഭർത്താവ് സച്ചിൻ ദേവിനുമെതിരെയും വിമർശനങ്ങൾ ജില്ലാ കമ്മിറ്റിയിൽ ഉയർന്നിരുന്നു. മേയറുടെ ധാർഷ്ട്യം കാരണം നഗരസഭാ ഭരണം പാർട്ടിക്ക് നഷ്ടപ്പെടുന്ന അവസ്ഥയാണെന്ന് വിലയിരുത്തലുണ്ടായി. മേയർക്കെതിരെ നടപടിയുടെ വക്കോളമെത്തിയെങ്കിലും രാഷ്ട്രീയ ഭാവിയെ ബാധിക്കുമെന്ന കാരണത്താൽ അതൊഴിവാക്കുകയായിരുന്നു. മുഖ്യമന്ത്രിക്കെതിരെ രൂക്ഷ വിമർശനം ഉന്നയിച്ച കരമന ഹരിക്കെതിരെ പാർട്ടി നടപടിക്കൊരുങ്ങുകയാണ്. എന്നാൽ നടപടിക്ക് മുന്നേ കരമന ഹരി പാർട്ടി വിട്ടേക്കുമെന്നും സൂചനയുണ്ട്.