ചൈനയ്ക്ക് വമ്പൻ തിരിച്ചടി ! വളർച്ചാ അനുമാനം വെട്ടിക്കുറച്ച് മൂഡീസ്

സാമ്പത്തിക മേഖലയിൽ ലോക മുതലാളിയാകാൻ ഒരുങ്ങിയ ചൈനയ്ക്ക് വമ്പൻ തിരിച്ചടി. ചൈനയുടെ വളർച്ച അനുമാനം വലിയ തോതിലാണ് പ്രമുഖ ക്രെഡിറ്റ് റേറ്റിംഗ് ഏജൻസിയായ മൂഡീസ് വെട്ടിക്കുറച്ചിരിക്കുന്നത്. വളർച്ചാ നിരക്കിലെ മെല്ലപ്പോക്കും റിയൽ എസ്‌റ്റേറ്റ് മേഖലയിലെ വെല്ലുവിളികളുമാണ് ചൈനയുടെ തകർച്ചയ്‌ക്ക് കാരണമായി ഏജൻസി കാണുന്നത്. ഇതോടെ, ലോകത്തിലെ രണ്ടാമത്തെ വലിയ സാമ്പത്തിക ശക്തിയായ ചൈന സ്ഥിരതയിൽ നിന്നും, നെഗറ്റീവ് റേറ്റിംഗിലേക്ക് പിന്തള്ളപ്പെട്ടിരിക്കുകയാണ്. താഴ്ന്ന ഇടത്തരം സാമ്പത്തിക വളർച്ചയുടെയും, വർദ്ധിച്ചുവരുന്ന കടത്തിന്റെയും പശ്ചാത്തലത്തിലാണ് മൂഡീസിന്റെ നടപടി. കടക്കെണിയിൽ അകപ്പെട്ട പ്രാദേശിക സർക്കാറുകൾക്കും, സർക്കാർ സ്ഥാപനങ്ങൾക്കും സാമ്പത്തിക സഹായം നൽകേണ്ടിവരുമെന്നത് ചൈനയ്ക്ക് വലിയ വെല്ലുവിളി ഉയർത്തിയിട്ടുണ്ട്. ഇത് ചൈനയുടെ സാമ്പത്തിക നില അപകടസാധ്യതകളിലേക്ക് നീങ്ങുന്ന സൂചനയാണ് നൽകുന്നതെന്ന് മൂഡീസ് അഭിപ്രായപ്പെട്ടു. ഇത് ചൈനയെ വീണ്ടും സാമ്പത്തികമായ അരക്ഷിതാവസ്ഥയിലേക്കാണ് തള്ളിവിടുന്നത്. രാജ്യത്തെ പ്രവിശ്യകളിലെ കടം 12.6 ട്രില്യൺ യുഎസ് ഡോളറാണെന്ന് എൈഎംഎഫ് പുറത്തുവിട്ട കണക്കുകൾ വ്യക്തമാക്കുന്നു. ഇപ്പോഴും ഈ സ്ഥിതി തുടരുന്ന അവസ്ഥയാണ് ചൈനയിലുള്ളത്.

അതേസമയം, റേറ്റിംഗ് താഴ്ത്തിയതിൽ നിരാശയുണ്ടെന്ന് ചൈനയുടെ ധനമന്ത്രാലയം അറിയിച്ചിട്ടുണ്ട്. സമ്പദ് വ്യവസ്ഥ ഉടൻ തന്നെ പഴയ നിലയിലേക്ക് തിരിച്ചെത്തുമെന്നും, പ്രാദേശിക സർക്കാറുകൾ നേരിടുന്ന പ്രതിസന്ധി പരിഹരിക്കുമെന്നും ചൈന വ്യക്തമാക്കി. അതേസമയം, ചൈനയുടെ വളർച്ചാ നിരക്ക് വെട്ടിക്കുറച്ചതിനോടൊപ്പം, 2024ലും, 2025ലും രാജ്യത്തിന്റെ വാർഷിക ജിഡിപി വളർച്ച 4.00 ശതമാനമായിരിക്കുമെന്ന് മൂഡീസ് അറിയിച്ചു. കൂടാതെ, 2026 മുതൽ 2030 വരെ ചൈനയുടെ വാർഷിക സാമ്പത്തിക വളർച്ച ശരാശരി 3.8 ശതമാനമായി ചുരുങ്ങുന്നതാണ്. അന്താരാഷ്ട്ര നാണയനിധിയുടെ ഏറ്റവും പുതിയ കണക്കുകൾ അനുസരിച്ച്, പ്രാദേശിക സർക്കാരുകളുടെ കടം 92 ട്രില്യൺ യുവാൻ ആണ്. അതേസമയം, കൊറോണയ്‌ക്ക് ശേഷം ചൈനയിലെ സാമ്പത്തികാവസ്ഥ വീണ്ടും താഴേക്ക് പോകുകയായിരുന്നു. റിയൽ എസ്റ്റേറ്റ് മേഖലയിൽ വലിയ നിക്ഷേപങ്ങൾ വന്നെങ്കിലും മേഖലയ്‌ക്ക് കാര്യമായ ഉണർവ്വുണ്ടായിട്ടില്ല. എന്നാൽ, ചൈനയിലെ സാമ്പത്തിക രം​ഗത്തെ ഈ അനിശ്ചിതാവസ്ഥ ഇന്ത്യയ്‌ക്കാണ് പ്രയോജനകരമായിരിക്കുന്നത്. വിദേശ നിക്ഷേപക സമൂഹം ഇതോടെ ഇന്ത്യയിലേക്ക് ചേക്കേറാനാണ് ആ​ഗ്രഹിക്കുന്നത്.