തലവേദനയായി ബൈക്ക് റൈസർമാർ ! ബൈക്കുകൾ പാലത്തിൽ നിന്നും താഴേക്കെറിഞ്ഞ് നാട്ടുകാർ ; ദൃശ്യങ്ങൾ വൈറൽ

ബംഗളൂരു : ബൈക്ക് റൈസർമാരെക്കൊണ്ട് പൊറുതിമുട്ടി ബൈക്കുകൾ പാലത്തിൽ നിന്നും താഴേക്കെറിഞ്ഞ് നാട്ടുകാർ. ബംഗളൂരുവിലെ നീലമംഗലയിലാണ് സംഭവം. നീലമംഗലയ്ക്ക് അടുത്തുള്ള പാലത്തിൽ നിന്നാണ് രണ്ട് ബൈക്കുകൾ നാട്ടുകാർ താഴേക്ക് എറിഞ്ഞത്. സംഭവത്തിന്റെ വീഡിയോ പുറത്ത്‌വന്നിട്ടുണ്ട്. നിമിഷ നേരം കൊണ്ടുതന്നെ വീഡിയോ വൈറലായിരിക്കുകയാണ്.

കഴിഞ്ഞ ദിവസം രണ്ട് ബൈക്കുകൾ തമ്മിലുള്ള റൈസിംഗിനിടെ മറ്റൊരു ഇരുചക്ര വാഹനത്തിൽ കൂട്ടിയിടിച്ച് അപകടമുണ്ടായിരുന്നു. ഇതോടെ പ്രദേശത്തുണ്ടായിരുന്ന നാട്ടുകാർ ചേർന്ന് ബൈക്ക് ഓടിച്ച യുവാക്കളെ തടഞ്ഞ് വയ്ക്കുകയും ബൈക്കുകൾ പിടിച്ചെടുക്കുകയുമായിരുന്നു. തുടർന്ന് ഈ ബൈക്കുകൾ പാലത്തിൽ നിന്നും നാട്ടുകാർ താഴേക്ക് എറിഞ്ഞു. അതേസമയം, യുവാക്കൾ ഉടൻ തന്നെ ഓടി രക്ഷപ്പെടുകയായിരുന്നു. സംഭവത്തിൽ പോലീസ് കേസെടുത്തിട്ടുണ്ട്. ബംഗളൂരു നഗരത്തിലെ റോഡുകളിൽ ഇത് സ്ഥിരമാണെന്നും ബൈക്ക് റൈസിംഗുകാരുടെ ശല്യം സഹിക്കാൻ വയ്യാതായിരിക്കുകയാണ്. അവരെ ഒരു പാഠം പഠിപ്പിക്കുന്നതിന് വേണ്ടിയാണ് ഇത്തരത്തിൽ ചെയ്തതെന്നും നാട്ടുകാർ വ്യക്തമാക്കി.