മലയാള സിനിമാലോകത്തിന്റെ ഭാവാഭിനയ ചക്രവർത്തിക്ക് ആശംസയുമായി മമ്മൂട്ടി; വീട്ടിൽ നേരിട്ടെത്തി സർപ്രൈസ് നൽകി മോഹൻലാൽ; ഏറെ സന്തോഷവും ആഹ്ലാദവുമെന്ന് മധു

തിരുവനന്തപുരം: നവതി ആഘോഷിക്കുന്ന നടൻ മധുവിന് ആശംസയുമായി മോഹൻലാലും മമ്മൂട്ടിയും. പിറന്നാൾദിനത്തിനു മുൻപേ മധുവിന്റെ തിരുവനന്തപുരം കണ്ണമ്മൂലയിലെ വീട്ടിലെത്തിയാണ് മോഹൻലാൽ ആശംസ നേർന്നത്. തലസ്ഥാനത്ത് തന്നെ നടക്കുന്ന സിനിമാ ചിത്രീകരണം കഴിഞ്ഞ് രാത്രിയാണ് അപ്രതീക്ഷിതമായി ലാൽ മധുവിന്റെ വീട്ടിൽ എത്തിയത്. ഏറെ സന്തോഷവും ആഹ്ളാദവുമെന്ന് മധു പറഞ്ഞു. നർമസംഭാഷണത്തിനൊടുവിൽ മധുവിനെ കെട്ടിപ്പിടിച്ച് ഉമ്മവച്ചാണ് ലാൽ മടങ്ങിയത്. ‘നവതിയുടെ നിറവിൽ നിൽക്കുന്ന എൻ്റെ പ്രിയപ്പെട്ട മധുസാറിന് ഹൃദയം നിറഞ്ഞ ജന്മദിനാശംസകൾ’ എന്ന് തന്റെ ഫേസ്ബുക്കിൽ മോഹൻലാൽ കുറിച്ചു.

കൂടാതെ, നടൻ മമ്മൂട്ടിയും ഫേസ്ബുക്കിലൂടെ ആശംസയറിയിച്ചു. ‘എന്റെ സൂപ്പർ സ്റ്റാറിന് ജന്മദിനാശംസകൾ’ എന്നാണ് നടൻ കുറിച്ചത്.

നീണ്ട അറുപത് വർഷത്തെ സിനിമാ ജീവിതത്തിൽ നായക കഥാപാത്രമായി മാത്രം ഒതുങ്ങിനിൽക്കാതെ, പ്രതിനായകനായും സഹനടനായും അച്ഛനായും അമ്മാവനായും തിരശീലയ്ക്ക് പിന്നിൽ സംവിധായകനായും നിർമ്മാതാവായുമൊക്ക കൈയൊപ്പ് ചാർത്തിയ മധുവിന്റെ 90-ാം ജന്മദിനം തിരുവനന്തപുരം ഫിലിം ഫ്രെട്ടേണിറ്റിയുടെ ആഭിമുഖ്യത്തിൽ ഇന്ന് ജന്മനാട് ആഘോഷിക്കുന്നു. ‘മധുമൊഴി ഇതിഹാസപർവം” എന്ന പേരിൽ നടക്കുന്ന പരിപാടി ഇന്ന് നിശാഗന്ധി ഓഡിറ്റോറിയത്തിൽ വൈകിട്ട് 6:15ന് ആരംഭിക്കും.