തെരഞ്ഞെടുപ്പ് അങ്കം: ശക്തമായ പ്രചാരണങ്ങൾക്ക് തുടക്കമിടാൻ ബിജെപി; പ്രധാനമന്ത്രി നരേന്ദ്രമോദി ഇന്ന് 20 വെർച്വൽ റാലികളെ അഭിസംബോധന ചെയ്യും

പനാജി: തെരഞ്ഞെടുപ്പ് നടക്കുന്ന അഞ്ചു സംസ്ഥാനങ്ങളിൽ ശക്തമായ പ്രചാരണങ്ങൾക്ക് (BJP Election Campaign) തുടക്കമിടാനൊരുങ്ങുകയാണ് ബിജെപി. ഇതോടനുബന്ധിച്ച് പ്രധാനമന്ത്രി നരേന്ദ്രമോദി ഇന്ന് 20 വെർച്വൽ റാലികളെ അഭിസംബോധന ചെയ്യും. നരേന്ദ്രമോദിയ്ക്ക് പുറമെ മുതിർന്ന ദേശീയ നേതാക്കളും കേന്ദ്ര മന്ത്രിമാരും ബിജെപി സ്ഥാനാർത്ഥികൾക്കായി പ്രചാരണം നടത്തും. ഇന്ന് പ്രചാരണം നടക്കുന്നത് ഗോവയിലാണ്. അതേസമയം വടക്കൻ ഗോവയിലെ 20 കേന്ദ്രങ്ങളിൽ 6 ന് വൈകീട്ട് 4 മണിക്ക് നടക്കുന്ന വെർച്വൽ റാലികളെ പ്രധാനമന്ത്രി അഭിസംബോധന ചെയ്യും.

പാർട്ടിയുടെ പ്രകടനപത്രികയും അന്ന് പുറത്തിറക്കുമെന്ന് ബിജെപി ഗോവ സംസ്ഥാന ഘടകം അറിയിച്ചു. കേന്ദ്രമന്ത്രി നിതിൻ ഗഡ്കരിയാണ് പ്രകടനപത്രിക പുറത്തിറക്കുക. സമൂഹത്തിന്റെ അടിത്തട്ടിലുള്ള ജനവിഭാഗങ്ങളുടെ അഭിപ്രായങ്ങളും നിർദ്ദേശങ്ങളും സ്വീകരിച്ചാണ് പ്രകടന പത്രിക തയ്യാറാക്കിയതെന്ന് നേതാക്കൾ പറഞ്ഞു. സംസ്ഥാനത്തിന്റെ സമഗ്രവികസനത്തിന് ആവശ്യമായ ശക്തമായ നിർദ്ദേശങ്ങൾ ഉൾക്കൊള്ളിച്ചുള്ള പ്രകടനപത്രികയാണ് പുറത്തിറക്കുകയെന്നും ബിജെപി നേതാക്കൾ കൂട്ടിച്ചേർത്തു.
കഴിഞ്ഞ അഞ്ച് വർഷം കൊണ്ട് നടപ്പിലാക്കുമെന്ന് ഉറപ്പ് നൽകിയ വാഗ്ദാനങ്ങളെല്ലാം പാർട്ടിക്ക് പാലിക്കാൻ കഴിഞ്ഞെന്നും നേതാക്കൾ പറഞ്ഞു.

അതേസമയം യുപിയിലും ശക്തമായ തെരഞ്ഞെടുപ്പ് പ്രചാരണങ്ങളാണ് നടന്നുകൊണ്ടിരിക്കുന്നത്. അമിത് ഷായുൾപ്പെടെയുള്ള നേതാക്കൾ പ്രചാരണത്തിനായി യുപിയിൽ ഇക്കഴിഞ്ഞ ദിവസങ്ങളിൽ എത്തിയിരുന്നു. വരുംദിവസങ്ങളിലും കൂടുതൽ ശക്തമായി പ്രചാരണം നടത്താനാണ് സംസ്ഥാന ബിജെപി നേതൃത്വം തീരുമാനിച്ചിരിക്കുന്നത്.