അമൃത്സറിലും ജലന്ധറിലും സ്ഫോടനങ്ങൾ! ആർക്കും പരിക്കേറ്റിട്ടില്ലെന്ന് റിപ്പോർട്ട്; ഫോറൻസിക് പരിശോധന ആരംഭിച്ചു; പഞ്ചാബിലെ സുരക്ഷാ സംവിധാനങ്ങൾ പൂർണ്ണമായും പരാജയപ്പെട്ടുവെന്ന് ബിജെപി

പഞ്ചാബിലെ അമൃത്സറിലും ജലന്ധറിലും മണിക്കൂറുകളുടെ വ്യത്യാസത്തിൽ സ്ഫോടനങ്ങൾ . ചൊവ്വാഴ്ച രാത്രി പത്തരയോടെ അമൃത്സറിലെ ഖാസ കന്റോൺമെന്റ് മേഖലയ്ക്ക് സമീപമാണ് ആദ്യത്തെ സ്ഫോടനമുണ്ടായത്. വലിയ ശബ്ദത്തോടെയുള്ള പൊട്ടിത്തെറി കേട്ടതിനെത്തുടർന്ന് പോലീസും സൈന്യവും ഉടനടി സ്ഥലത്തെത്തി പ്രദേശം വളഞ്ഞു. സംഭവസ്ഥലത്തുനിന്ന് ശാസ്ത്രീയ തെളിവുകൾ ശേഖരിച്ചതായും സ്ഫോടനത്തിന്റെ കൃത്യമായ കാരണം ഫോറൻസിക് പരിശോധനയ്ക്ക് ശേഷം മാത്രമേ വ്യക്തമാകൂ എന്നും അമൃത്സർ എസ്.പി. ആദിത്യ എസ്. വാര്യർ അറിയിച്ചു. ഈ സംഭവത്തിൽ ആർക്കും പരിക്കേറ്റതായി റിപ്പോർട്ടുകളില്ല.

അമൃത്സറിലെ സംഭവത്തിന് മണിക്കൂറുകൾക്ക് മുൻപാണ് ജലന്ധറിലെ ബി.എസ്.എഫ്. പഞ്ചാബ് ഫ്രണ്ടിയർ ആസ്ഥാനത്തിന് മുന്നിൽ മറ്റൊരു സ്ഫോടനം നടന്നത്. രാത്രി എട്ടു മണിയോടെ റോഡരികിൽ പാർക്ക് ചെയ്തിരുന്ന സ്കൂട്ടർ പൊട്ടിത്തെറിക്കുകയായിരുന്നു. കൊറിയർ ഡെലിവറി ബോയി ഗുർപ്രീത് സിംഗ് എന്ന യുവാവിന്റെ വാഹനമാണ് തകർന്നത്. വാഹനത്തിൽനിന്ന് മാറിനിന്നതിനാൽ യുവാവ് നിസാര പരിക്കുകളോടെ രക്ഷപ്പെട്ടു. ആരോ എന്തോ എറിഞ്ഞതിനെത്തുടർന്നാണ് സ്കൂട്ടർ പൊട്ടിത്തെറിച്ചതെന്ന് യുവാവിന്റെ കുടുംബം ആരോപിക്കുമ്പോൾ, ഇത് കേവലം അപകടമാണോ അതോ ആസൂത്രിതമായ സ്ഫോടനമാണോ എന്ന് പോലീസ് പരിശോധിച്ചു വരികയാണ്. ബിഎസ്എഫ് ആസ്ഥാനത്തിന് മുന്നിലുണ്ടായ സംഭവം എന്ന നിലയിൽ അതീവ ഗൗരവത്തോടെയാണ് സുരക്ഷാ ഏജൻസികൾ ഇതിനെ കാണുന്നത്.

കഴിഞ്ഞ ഏപ്രിൽ 27-ന് പട്യാലയിൽ റെയിൽവേ ട്രാക്ക് തകർക്കാനുള്ള ശ്രമത്തിനിടെ ഒരാൾ കൊല്ലപ്പെട്ടതിന് പിന്നാലെയാണ് സംസ്ഥാനത്തെ നടുക്കിയ പുതിയ സംഭവങ്ങൾ അരങ്ങേറുന്നത്. ഇതോടെ എ.എ.പി. സർക്കാരിന്റെ ക്രമസമാധാന പാലനത്തിലെ വീഴ്ചകൾ ചൂണ്ടിക്കാട്ടി പ്രതിപക്ഷം രംഗത്തെത്തിയിട്ടുണ്ട്. സ്ഥിതിഗതികൾ ഗൗരവമുള്ളതാണെന്നും സർക്കാർ വസ്തുതകൾ മറച്ചുവെക്കാൻ ശ്രമിക്കുകയാണെന്നും ശിരോമണി അകാലിദൾ നേതാവ് ബിക്രം സിംഗ് മജിതിയ കുറ്റപ്പെടുത്തി. അതിർത്തി സംസ്ഥാനമായ പഞ്ചാബിൽ സുരക്ഷാ സംവിധാനങ്ങൾ പൂർണ്ണമായും പരാജയപ്പെട്ടുവെന്ന് ബിജെപി ആരോപിച്ചു. നിലവിൽ ഫോറൻസിക് റിപ്പോർട്ടുകൾക്കായി കാത്തിരിക്കുകയാണെന്നും അന്വേഷണം പുരോഗമിക്കുകയാണെന്നുമാണ് പോലീസ് നൽകുന്ന വിശദീകരണം.