ഇരുട്ടിന്റെ മറവിൽ വീണ്ടും നുഴഞ്ഞു കയറ്റ ശ്രമം; ഇന്ത്യൻ മണ്ണിൽ കാലുകുത്തിയതോടെ സൈന്യത്തിന്റെ തിരിച്ചടി: ഒരു ഭീകരനെ സൈന്യം വധിച്ചു

ശ്രീനഗർ: അതിർത്തിയിൽ നുഴഞ്ഞുകയറ്റശ്രമം വീണ്ടും പരാജയപ്പെടുത്തി സുരക്ഷാ സേന. രണ്ടിടങ്ങളിൽ നിന്നും രണ്ടുപേരാണ് നുഴഞ്ഞുകയറാൻ ശ്രമങ്ങൾ നടത്തിയത്. സംഭവത്തിൽ സുരക്ഷാ സേന ഒരാളെ വധിക്കുകയും ഒരാളെ കസ്റ്റഡിയിലെടുക്കുകയും ചെയ്തു.

പുലർച്ചെ 2.30-ഓടെ അർണിയ അതിർത്തിയിലാണ് നുഴഞ്ഞുകയറാൻ ശ്രമിച്ചത്. ഇത് ശ്രദ്ധയിൽപ്പെട്ടതോടെ സുരക്ഷാ സേന പിൻമാറാൻ ആവശ്യപ്പെട്ടെങ്കിലും നുഴഞ്ഞു കയറ്റക്കാരൻ ഇന്ത്യൻ പ്രദേശത്തേക്ക് കടക്കുകയായിരുന്നു. തുടർന്ന് സേനയ്‌ക്ക് നേരെ വെടിയുതിർത്തു. തിരികെ സൈന്യം നടത്തിയ വെടിവെയ്പ്പിൽ നുഴഞ്ഞ് കയറ്റക്കാരനെ വധിച്ചു.

പുലർച്ചെ 4.30-ഓടെയാണ് മറ്റൊരു സംഭവം റിപ്പോർട്ട് ചെയ്തത്. നുഴഞ്ഞു കയറാൻ ശ്രമിക്കുന്നതിനിടയിൽ സേനയുടെ ശ്രദ്ധയിൽപ്പെടുകയായിരുന്നു. തുടർന്ന് നുഴഞ്ഞുകയറ്റക്കാരൻ കീഴടങ്ങുകയായിരുന്നു. സംഭവത്തിൽ കൂടുതൽ വിവരങ്ങൾ ഇനിയും പുറത്തുവരാനുണ്ടെന്ന് സുരക്ഷാ വൃത്തങ്ങൾ വ്യക്തമാക്കി.