കാമുകന്റെ പ്രായം 22, കാമുകി 22 വയസ്സുകാരന്റെ അമ്മ; ഇൻസ്റ്റഗ്രാമിലൂടെ പ്രണയിച്ച കാമുകിയെ നേരിട്ട് കണ്ടപ്പോൾ ഞെട്ടിത്തരിച്ച് കാമുകൻ

കാളികാവ്: ഇൻസ്റ്റഗ്രാമിലൂടെ പരിചയപ്പെട്ട കാമുകിയെ കണ്ട് ഞെട്ടി യുവാവ്. നേരിൽ കാണാനായി യുവാവ് കാമുകിയ്ക്ക് തന്റെ ലൊക്കേഷൻ കൈമാറിയിരുന്നു. ലൊക്കേഷൻ നോക്കി വീട്ടിൽ വന്നുകയറിയ കാമുകിയെ കണ്ട് യുവാവ് സ്‌തംഭനായി നിന്നു. കാളികാവ് സ്റ്റേഷൻ പരിധിയിലാണ് സംഭവം.

ഇൻസ്റ്റാഗ്രാമിലൂടെ യുവതിയെ പരിചയപ്പെട്ടപ്പോൾ തന്നെ യുവാവ് തനിക്ക് 22 വയസാണെന്ന് പറഞ്ഞിരുന്നു. അതേസമയം യുവതി യുവാവിനോട് തനിക്ക് 18 വയസ്സെന്ന് ആണ് ചാറ്റിൽ പറഞ്ഞിരുന്നത്. എന്നാൽ കാമുകി യുവാവിന്റെ വീട്ടില്‍ എത്തിയതോടെയാണ് കാമുകി മധുരപതിനേഴുകാരി അല്ലെന്നും തന്റെ അമ്മയുടെ പ്രായം കാമുകിക്കുണ്ടെന്ന സത്യം യുവാവ് മനസിലാക്കുന്നത്. അതുമാത്രമല്ല, തന്റെ അതേ പ്രായമുള്ള, അതായത് 22 വയസ്സുള്ള ഒരു മകൻ കാമുകിക്കുണ്ടെന്നും യുവാവ് തിരിച്ചറിഞ്ഞു.

യുവാവും കുടുംബവും കാമുകിയെ വീട്ടിൽ നിന്ന് ഇറക്കിവിടാൻ ശ്രമിച്ചെങ്കിലും നടന്നില്ല. ഞാൻ വെറുതെ പോകാൻ വന്നതല്ലെന്നും എന്റെ കാമുകന്റെ കൂടെ ജീവിക്കാനാണ് വന്നതെന്നായിരുന്നു കാമുകിയുടെ നിലപാട്. യുവതി പോകില്ലെന്നുറപ്പായതോടെ ഒടുവിൽ യുവാവിന് പോലീസിന്റെ സഹായം തേടേണ്ടി വന്നു. സ്ത്രീയെ കാണാനില്ലെന്ന് ആരോപിച്ച് ബന്ധുക്കൾ നേരത്തെ തന്നെ കോഴിക്കോട് പോലീസിനു പരാതി നല്കിയിരുന്നു. സ്ത്രീ കാളികാവിലുണ്ടെന്ന് വിവരം ലഭിച്ചതോടെ കോഴിക്കോട് നിന്ന് ബന്ധുക്കൾ കാളികാവിലെത്തി. കാമുകൻ വീട്ടമ്മയെ ഇറക്കിക്കൊണ്ടു വന്നതെന്നാണ് വീട്ടമ്മയുടെ ബന്ധുക്കൾ കരുതിയിരുന്നത്. അതിനാൽ യുവാവിനെ കൈകാര്യം ചെയ്യണം എന്ന ഉദ്ദേശത്തോടെയായിരുന്നു ബന്ധുക്കൾ കാളികാവിലെത്തിയത്. എന്നാൽ ഇത് മനസ്സിലാക്കിയ യുവാവിന്റെ ബന്ധുക്കൾ പോലീസ് സ്റ്റേഷനിൽ നിന്ന് നടപടിക്രമങ്ങൾ വേഗത്തിൽ പൂർത്തിയാക്കി ഇടവഴിയിലൂടെ യുവാവിനെ കുടുംബവീട്ടിലേക്കു മാറ്റി രക്ഷിച്ചു.