ബ്രിട്ടീഷ് പൗരത്വ വിവാദം വീണ്ടും പുകയുന്നു; രാഹുൽ ഗാന്ധിയുടെ രാഷ്ട്രീയ ഭാവി തുലാസിൽ

രാഹുൽ ഗാന്ധിയുടെ പൗരത്വത്തെക്കുറിച്ച് ലഭിച്ച പരാതിയിന്മേൽ ഇതുവരെ സ്വീകരിച്ച നടപടികളുടെ എല്ലാ ഫയലുകളും രേഖകളും ഹാജരാക്കാൻ കോടതി ഉത്തരവിട്ടു. അലഹബാദ് ഹൈക്കോടതിയുടെ ലക്നൗ ബെഞ്ചാണ് തിങ്കളാഴ്ച ഈ സുപ്രധാന നിർദ്ദേശം നൽകിയത്.
​കർണാടക സ്വദേശിയായ ബിജെപി പ്രവർത്തകൻ എസ്. വിഗ്നേഷ് ശിശിർ നൽകിയ ഹർജി പരിഗണിച്ചാണ് ജസ്റ്റിസ് രാജീവ് സിങ്ങിന്റെ ബെഞ്ച് ഉത്തരവ് പുറപ്പെടുവിച്ചത്.

രാഹുൽ ഗാന്ധിക്ക് ബ്രിട്ടീഷ് പൗരത്വമുണ്ടെന്നും ഇതിന് മതിയായ തെളിവുകൾ തന്റെ കൈവശമുണ്ടെന്നുമാണ് ശിശിറിന്റെ വാദം.
​രാഹുൽ ഗാന്ധിക്കെതിരെ എഫ്.ഐ.ആർ രജിസ്റ്റർ ചെയ്യണമെന്ന് ആവശ്യപ്പെട്ട് ശിശിർ നേരത്തെ വിചാരണ കോടതിയെ സമീപിച്ചിരുന്നു.
​ പൗരത്വം പോലുള്ള സങ്കീർണ്ണമായ വിഷയങ്ങളിൽ തീരുമാനമെടുക്കാൻ തങ്ങൾക്ക് അധികാരമില്ലെന്ന് ചൂണ്ടിക്കാട്ടി ജനുവരി 28-ന് വിചാരണ കോടതി ഈ ഹർജി തള്ളുകയായിരുന്നു.
​ഇതിനെതിരെ സമർപ്പിച്ച അപ്പീലിലാണ് ഹൈക്കോടതി ഇപ്പോൾ കേന്ദ്രത്തോട് വിശദീകരണം തേടിയിരിക്കുന്നത്.

​പരാതിയുമായി ബന്ധപ്പെട്ട എല്ലാ രേഖകളും സമർപ്പിക്കണമെന്നും കോടതി നിർദ്ദേശം നൽകി. പാസ്പോർട്ട് നിയമം, ഔദ്യോഗിക രഹസ്യ നിയമം എന്നിവ ലംഘിച്ച രാഹുൽ ഗാന്ധിക്കെതിരെ വിശദമായ അന്വേഷണം വേണമെന്നാണ് ഹർജിക്കാരന്റെ ആവശ്യം.
​കേസ് വീണ്ടും പരിഗണിക്കുന്ന മാർച്ച് 19-ന് കേന്ദ്ര സർക്കാർ സമർപ്പിക്കുന്ന റിപ്പോർട്ടുകൾ രാഹുൽ ഗാന്ധിയുടെ രാഷ്ട്രീയ ഭാവിയിൽ തന്നെ അതീവ നിർണ്ണായകമായേക്കും.