ദില്ലിയിൽ ഇനി ബിഎസ്6 മാനദണ്ഡങ്ങൾ പാലിക്കുന്ന ഡീസൽ വാഹനങ്ങൾ രജിസ്റ്റർ ചെയ്യാം; അനുമതി നൽകി സുപ്രീം കോടതി

ദില്ലിയിൽ ബിഎസ്6 മാനദണ്ഡങ്ങൾ പാലിക്കുന്ന എല്ലാ ഡീസല്‍ വാഹനങ്ങളും രജിസ്റ്റര്‍ ചെയ്യാന്‍ സുപ്രീംകോടതി അനുമതി നല്‍കി. കഴിഞ്ഞ മേയ് 15-ന് ഇറക്കിയ ഉത്തരവ് ഭേദഗതി ചെയ്തുകൊണ്ടാണ് സുപ്രീംകോടതി ഇക്കാര്യം വ്യക്തമാക്കിയത്. എട്ട് പേര്‍ ഇരിക്കുന്ന ബിഎസ് 6 ഡീസല്‍ വാഹനങ്ങള്‍ രജിസ്റ്റര്‍ ചെയ്യാന്‍ അനുവദിക്കണമെന്നായിരുന്നു അന്നത്തെ ആവശ്യം. ജി.-20 ഉച്ചകോടിക്ക് വേണ്ടിയായിരുന്നു അത്. പിന്നീടാണ് ജി.-20ക്ക് വേണ്ടി മാത്രമായല്ല അപേക്ഷയെന്നറിയിച്ചത്. ഇതോടെ ഉത്തരവ് ഭേദഗതി ചെയ്യുകയായിരുന്നു. ജി-20 ഉച്ചകോടിക്ക് ആവശ്യമുണ്ടോ ഇല്ലയോ എന്നത് മാനദണ്ഡമാക്കേണ്ടതില്ലെന്നും എല്ലാ വാഹനങ്ങളും ദില്ലിയിൽ രജിസ്റ്റര്‍ ചെയ്യാമെന്നും ജസ്റ്റിസ് എസ്.കെ. കൗള്‍ അധ്യക്ഷനായ ബെഞ്ച് വ്യക്തമാക്കി.

എട്ട് പേര്‍ ഇരിക്കുന്ന വാഹനങ്ങള്‍, ബസുകള്‍ തുടങ്ങി ബിഎസ് 6 മലിനീകരണ മാനദണ്ഡങ്ങൾ പാലിച്ചിരുന്നിട്ടു കൂടി ഡീസല്‍ വണ്ടികള്‍ രജിസ്റ്റര്‍ ചെയ്യാന്‍ ദില്ലി ആര്‍.ടി.ഒ. അനുവദിക്കുന്നില്ലെന്നതു ചൂണ്ടിക്കാട്ടി ഇക്കഴിഞ്ഞ ഏപ്രിലിലാണ് ഇന്ത്യന്‍ ടൂറിസ്റ്റ് ട്രാന്‍സ്‌പോര്‍ട്ടേഴ്സ് അസോസിയേഷന്‍ സുപ്രീംകോടതിയെ സമീപിച്ചത്. ഇത്തരം വാഹനങ്ങളുടെ രജിസ്ട്രേഷന്‍ ദില്ലിയിൽ തടയുന്ന യാതൊരു ഉത്തരവുമില്ലെന്നും പരാതിക്കാര്‍ കോടതിയിൽ വ്യക്തമാക്കിയിരുന്നു .