നാട്ടു നാട്ടുവിന് ചുവടുവച്ച് ബി.ടി.എസ് താരം ജങ്കൂക്ക്; രാജമൗലി ചിത്രം ആർ.ആർ.ആർ കൊറിയയിൽ ട്രെന്റിങ്ങിൽ രണ്ടാമത്

രാജമൗലി ചിത്രം ആര്‍.ആര്‍.ആര്‍ ദക്ഷിണ കൊറിയയിലും ശ്രദ്ധ നേടുന്നു. നിരവധി അന്താരാഷ്ട്ര പുരസ്‌കാരങ്ങള്‍ സ്വന്തമാക്കിയ ചിത്രമാണ് ആർ.ആർ.ആർ. ഇപ്പോൾ ദക്ഷിണ കൊറിയയിലും ചിത്രം ട്രെന്റാവുകയാണ്. നെറ്റ്ഫ്‌ലിക്‌സ് ട്രെന്റിങ്ങിലാണ് ചിത്രം രണ്ടാമതെത്തിയിരിക്കുന്നത്. ഇപ്പോൾ കൊറിയന്‍ ബാന്റായ ബി.ടി.എസിലെ ജങ്കൂക്ക് തന്റെ ലൈവിനിടെ നാട്ടു നാട്ടുവിലെ കുറച്ച് വരികള്‍ ആലപിച്ചിരിക്കുകയാണ്.

നാട്ടു നാട്ടു പ്ലേ ചെയ്തുകൊണ്ട് ജങ്കൂക്ക് കഴിഞ്ഞ ദിവസം ചുവടുവെക്കുകയും ചെയ്തിരുന്നു. ജങ്കൂക്കിന്റെ ലൈവ് കണ്ട് ഇപ്പോൾ ബി.ടി.എസ് ആരാധകര്‍ ഗാനം ഏറ്റെടുത്തിരിക്കുകയാണ്. നാട്ടു നാട്ടു ഗാനം ട്വിറ്ററില്‍ മുൻപേ ട്രെന്റിങ്ങില്‍ ഇടം നേടിയിരുന്നു. ഇതിന് പിന്നാലെയാണ് ഇപ്പോൾ ആര്‍.ആര്‍.ആര്‍ ട്രെന്റിങ്ങില്‍ ഇടം നേടിയിരിക്കുന്നത്.

ആർ.ആർ.ആറിനെ ട്രെന്റാക്കിയ ജങ്കൂക്കിന് ആര്‍.ആര്‍.ആര്‍ ടീം ട്വിറ്ററിലൂടെ നന്ദിയറിയിച്ചു. ഓസ്‌കര്‍ വേദിയില്‍ നാട്ടു നാട്ടു എന്ന ഗാനം സംഗീത സംവിധായകന്‍ കീരവാണിയുടെ നേതൃത്വത്തില്‍ ലൈവ് പെര്‍ഫോമന്‍സ് ചെയ്യുന്നുണ്ട്. രാംചരണും ജൂനിയര്‍ എന്‍.ടി.ആറും പ്രധാന വേഷത്തിലെത്തിയ ചിത്രത്തിന് ഓസ്‌കര്‍ നാമനിര്‍ദേശം ലഭിച്ചിട്ടുമുണ്ട്.