ദില്ലി : സംസ്ഥാനത്തെ 13 ജില്ലകളിലെ 44 തദ്ദേശ സ്വയംഭരണ വാര്ഡുകളില് ജൂണ് 27ന് ഉപതിരഞ്ഞെടുപ്പ് നടക്കുമെന്ന് സംസ്ഥാന തെരഞ്ഞെടുപ്പ് കമ്മിഷണര് വി. ഭാസ്കരന്.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, വയനാട്, കണ്ണൂര് ജില്ലകളിലെ 33 ഗ്രാമപഞ്ചായത്ത് വാര്ഡുകളിലും ആലപ്പുഴ, തൃശൂര് ജില്ലകളിലെ ഓരോ ബ്ലോക്ക് പഞ്ചായത്ത് വാര്ഡുകളിലും കോട്ടയം, ഇടുക്കി ജില്ലകളില് രണ്ട് വീതം ബ്ലോക്ക് പഞ്ചായത്ത് വാര്ഡുകളിലും ആലപ്പുഴ ജില്ലയില് രണ്ട് നഗരസഭാ വാര്ഡുകളിലും ഇടുക്കി, മലപ്പുറം, കോഴിക്കോട് ജില്ലകളില് ഓരോ നഗരസഭാ വാര്ഡുകളിലുമാണ് ഉപതെരഞ്ഞെടുപ്പ്.
മാതൃകാ പെരുമാറ്റച്ചട്ടം നിലവില് വന്നു. തെരഞ്ഞെടുപ്പ് വിജ്ഞാപനം 31ന് പുറപ്പെടുവിക്കും. നാമനിര്ദ്ദേശ പത്രിക ജൂണ് 7 വരെ സമര്പ്പിക്കാം. സൂക്ഷ്മപരിശോധന 10ന് നടക്കും. സ്ഥാനാര്ത്ഥിത്വം പിന്വലിക്കാനുള്ള അവസാന ദിവസം 12 ആണ്. വോട്ടെടുപ്പ് ജൂണ് 27ന് രാവിലെ 7 മണിക്ക് ആരംഭിച്ച് വൈകിട്ട് 5ന് അവസാനിക്കും. വോട്ടെണ്ണല് 28ന് രാവിലെ 10ന് നടക്കും.
