കുനോയിൽ ചീറ്റകൾക്ക് എതിരാളികളാകുമോ കടുവ; നവംബറില്‍ മധ്യപ്രദേശിൽ മാധ്യമപ്രവര്‍ത്തകരെ ആക്രമിച്ച കടുവ കുനോയിൽ പ്രവേശിച്ചു; ആശങ്കയിൽ വനംവകുപ്പ്

ഭോപ്പാല്‍ : രന്തംബോര്‍ റിസര്‍വില്‍നിന്നുളള കടുവ ദക്ഷിണാഫ്രിക്കയിൽ നിന്നെത്തിച്ച ചീറ്റകളെ പാർപ്പിച്ചിരിക്കുന്ന കുനോ ദേശീയോദ്യാനത്തിലേക്ക് പ്രവേശിച്ചു എന്ന റിപ്പോർട്ടുകൾ പുറത്ത് വന്നു. നിലവില്‍ ദേശീയോദ്യാനത്തില്‍ ചീറ്റകൾക്ക് പുറമെ പുള്ളിപ്പുലി, കടുവ തുടങ്ങിയ വന്യജീവികളുമുണ്ട്. ടി 136 എന്ന് പേരിട്ടിരിക്കുന്ന ഈ കടുവ നവംബര്‍ 2022 മുതല്‍ ഷിയോപുര്‍ ജില്ലയിലെ ചമ്പല്‍ നദിക്കര കേന്ദ്രമാക്കി വാസമുറപ്പിച്ചിരുന്നു. ഇക്കഴിഞ്ഞ ഞായറാഴ്ചയാണ് ഇത് കുനോ ദേശീയോദ്യാനത്തിലേക്ക് പ്രവേശിച്ചത്. എട്ടു വര്‍ഷ കാലയളവില്‍ രന്തംബോറില്‍ നിന്നുള്ള ആറ് കടുവകള്‍ കുനോ ദേശീയോദ്യാനത്തിലേക്ക് കടന്നു കയറിയത്.

എന്നാല്‍ നേരത്തെ കടന്നുകയറിയ കടുവകളൊന്നും ഇതുവരെ അവരുടെ അധീനപ്രദേശമായി കുനോ ദേശീയോദ്യാനം തിരഞ്ഞെടുത്തിട്ടില്ല. പട്രോളിങ് സംഘവും കടുവയുടെ സാന്നിധ്യം തിരിച്ചറിഞ്ഞിട്ടുണ്ട്. വനം വകുപ്പ് അധികൃതര്‍ മൂന്ന് ചീറ്റകളുടെ സഞ്ചാരപാത സസൂക്ഷ്മം നിരീക്ഷിച്ചു കൊണ്ടിരിക്കുകയാണ്. കടുവ ചീറ്റകളുള്ള മേഖലയിലേക്ക് കടന്നുകയറുമോ എന്ന ആശങ്കയിലാണ് വനം വകുപ്പ്.

കഴിഞ്ഞ വര്‍ഷം നവംബറില്‍ മധ്യപ്രദേശിലെ മൊറീന ജില്ലയിലെ ജൗറ ടെഹ്‌സില്ലില്‍ രണ്ടു മാധ്യമപ്രവര്‍ത്തകരെ ആക്രമിച്ച അതേ കടുവയാണിതെന്ന് സ്ഥിരീകരിച്ചിട്ടുണ്ട്. നേരത്തെ അവിടെനിന്ന് ഈ കടുവയെ രാജസ്ഥാനിലെ കൈലാദേവി വന്യജീവി സങ്കേതത്തിലെത്തിച്ചിരുന്നു. അവിടെ നിന്ന് യാത്ര ആരംഭിച്ച കടുവ പൊഹാരി ഗ്രാമത്തിലും സാന്നിധ്യമറിയിച്ചിരുന്നു . ചീറ്റകളുള്ളതിന് 25 കിലോ മീറ്റര്‍ അകലെയാണ് പൊഹാരി.

കഴിഞ്ഞ ഒബന്‍ എന്ന് പേരുള്ള ആണ്‍ചീറ്റ കടുവകളുള്ള മാധവ് നാഷണല്‍ പാര്‍ക്കിലെ അതിര്‍ത്തി കടന്ന് എത്തിയിരുന്നു. എന്നാൽ ആപത്ത് മനസിലായതോടെ തിരികെ പോരുകയായിരുന്നു ഒബന്‍. ചീറ്റകളെത്തിയ നമീബിയയിലോ ദക്ഷിണാഫ്രിക്കയിലോ കടുവകളുടെ സാന്നിധ്യമില്ല. ഇട തൂര്‍ന്ന വനപ്രദേശങ്ങളില്‍ ആധിപത്യം കടുവകൾക്കാണെന്നാണ് കരുതപ്പെടുന്നത്.