മാംസത്തിലും ബിയറിലും ക്യാൻസറിന് കാരണമാകുന്ന രാസവസ്തുക്കൾ;പഠന റിപ്പോർട്ട് പുറത്ത്

നാം കഴിക്കുന്ന ഭക്ഷണം നമ്മുടെ ആരോഗ്യത്തെ ഒരു പരിധിവരെ സ്വാധീനിക്കാറുണ്ട്. ഇപ്പോൾ കൂടുതലും വിപണിയെ ആശ്രയിച്ചാണ് നമ്മുടെ ഭക്ഷണസംസ്കാരം മുന്നോട്ട് പോകുന്നത്. എന്നാല്‍ ഇത്തരം ഭക്ഷണങ്ങള്‍ ആരോഗ്യത്തിന് വലിയ വെല്ലുവിളിയാണ് സൃഷ്ടിക്കുന്നത്. ഇതുമായി ബന്ധപ്പെട്ട ഒരു പഠന റിപ്പോർട്ടാണ് ഇപ്പോൾ പുറത്തു വന്നിരിക്കുന്നത്. മാംസത്തിലും ബിയറിലും ക്യാൻസറിന് കാരണമാകുന്ന രാസവസ്തുക്കൾ ഉണ്ടെന്ന പഠന റിപ്പോർട്ടാണ് ഇപ്പോൾ പുറത്ത് വന്നിരിക്കുന്നത്.

നൈട്രോസാമൈൻസ് എന്ന അർബുദത്തിന് കാരണമാകുന്ന രാസ സംയുക്തങ്ങൾ നിത്യേന കഴിക്കുന്ന ഭക്ഷണങ്ങളിൽ അടങ്ങിയിരിക്കുന്നുവെന്നാണ് കണ്ടെത്തിയിരിക്കുന്നത്. യൂറോപ്യൻ ഫുഡ് സേഫ്റ്റി ഏജൻസിയില്‍ നിന്നുള്ള ഗവേഷകരാണ് പഠന റിപ്പോർട്ട് പുറത്തു വിട്ടിരിക്കുന്നത്. എല്ലാവരെയും ഏറെ ആശങ്കപ്പെടുത്തുന്ന വിവരം തന്നെയാണ് ഗവേഷകര്‍ ഇപ്പോൾ പങ്കുവച്ചിരിക്കുന്നത്. ഈ വിഭവങ്ങളിലൊന്നും നൈട്രോസാമൈൻസ് ബോധപൂര്‍വം ചേർക്കുന്നതല്ല. വിഭവങ്ങള്‍ തയ്യാറാക്കുകയും പ്രോസസ് ചെയ്തെടുക്കുകയും ചെയ്യുമ്പോള്‍ ഇവ തനിയെ രൂപപ്പെട്ട് വരികയാണെന്നാണ് റിപ്പോർട്ടിൽ പറയുന്നത്.