മഴക്കെടുതി: കേരളത്തിന് കേന്ദ്രത്തിന്റെ സഹായ ഹസ്തം; ദുരിതാശ്വാസ സഹായങ്ങൾ ലഭ്യമാക്കും

ദില്ലി: മഴക്കെടുതിയിൽ വലയുന്ന കേരളത്തിന് കൈയയച്ച് സഹായം വാഗ്ദാനം ചെയ്ത് കേന്ദ്ര സർക്കാർ. പ്രധാനമന്ത്രി നരേന്ദ്ര മോദിയും ആഭ്യന്തരമന്ത്രി അമിത് ഷായും കേരളത്തിനുവേണ്ട എല്ലാ സഹായങ്ങളെല്ലാം ലഭ്യമാക്കുമെന്ന് അറിയിച്ചു.

പ്രളയ ദുരിത അനുഭവിക്കുന്ന കേരളത്തിന് ആവശ്യമായ സഹായങ്ങൾ ലഭ്യമാക്കുമെന്ന് അമിത് ഷാ അറിയിച്ചു. ഗവർണ്ണർ ജസ്റ്റിസ് പി സദാശിവത്തോട് സംസാരിക്കവെയാണ് അമിത് ഷാ ഇതുസംബന്ധിച്ച ഉറപ്പ് നൽകിയത്. സംസ്ഥാനത്തെ രക്ഷാ പ്രവർത്തനങ്ങളെയും നിലവിലെ പ്രളയ സ്ഥിതിയെയും അവലോകനം ചെയ്ത് ഗവർണർ കേന്ദ്ര ആഭ്യന്തര മന്ത്രിയ്ക്ക് റിപ്പോർട്ട് നൽകിയിരുന്നു. തുടർന്ന് അമിത് ഷായെ ഫോണിൽ ബന്ധപ്പെട്ട ഗവർണർ ഉരുൾ പൊട്ടൽ ബാധിത ജില്ലകളിൽ കൂടുതൽ സഹായം തേടുകയും ചെയ്തു. ഇതിനിടെയാണ് സംസ്ഥാനത്തിന് വേണ്ട എല്ലാ സഹാങ്ങളും ചെയ്യുമെന്ന് അമിത് ഷാ ഉറപ്പുനൽകിയത്.

വർദ്ധിക്കുന്ന മരണസംഖ്യ, വെള്ളപ്പൊക്കവും ഉരുൾപൊട്ടലും മൂലം മാറിത്താമസിക്കേണ്ടി വരുന്നവരുടെ അവസ്ഥ, രക്ഷാപ്രവർത്തനത്തിൽ നേരിടുന്ന ബുദ്ധിമുട്ടുകൾ, മഴ തുടർന്നാലുള്ള അപകടസാധ്യത, സേനയും കോസ്റ്റ് ഗാഡും മറ്റ് ഏജൻസികളും സർക്കാർ സംവിധാനത്തിന് നൽകുന്ന പൂർണ പിന്തുണ തുടങ്ങിയ കാര്യങ്ങൾ ഗവർണർ അമിത് ഷായെ ധരിപ്പിച്ചു.

രക്ഷാപ്രവർത്തനങ്ങളെക്കുറിച്ച് മുഖ്യമന്ത്രി പിണറായി വിജയന്‍ ഫോണിൽ ചർച്ച നടത്തിയതായും ഗവർണർ അമിത് ഷായെ ധരിപ്പിച്ചു . രക്ഷാപ്രവർത്തനങ്ങളിൽ മുഖ്യമന്ത്രിക്ക് എല്ലാ പിന്തുണയും വാഗ്ദാനം ചെയ്തതായും ഗവർണർ ആഭ്യന്തരമന്ത്രാലയത്തിന് നല്‍കിയ റിപ്പോർട്ടിലുണ്ട്.