ഊട്ടിയിലെ സൈനിക ഹെലികോപ്റ്റർ അപകടം; വ്യോമസേന മേധാവി അപകടസ്ഥലത്ത്; ഉന്നത ഉദ്യോഗസ്ഥരുടെ നേതൃത്വത്തിൽ കടുത്ത പരിശോധന

കോയമ്പത്തൂർ: തമിഴ്‌നാട്ടിലെ നീലഗിരി കുനൂരില്‍ സംയുക്ത സേനാ മേധാവി ജനറൽ ബിപിൻ റാവത്തുൾപ്പെടെ 13 പേർ ഹെലികോപ്റ്റർ തകർന്ന് മരിച്ച സംഭവത്തിൽ വ്യോമസേനാ ഉദ്യോഗസ്ഥർ പരിശോധന നടത്തി.

വ്യോമസേന മേധാവി എയർ ചീഫ് മാർഷൽ വിവേക് റാം ചൗധരി സ്ഥലത്തെത്തി, തകർന്ന ഹെലികോപ്റ്റർ പരിശോധിച്ചു. അദ്ദേഹത്തിനൊപ്പം മറ്റു ഉന്നത ഉദ്യോസ്ഥരുമുണ്ട്. പരിശോധനയിൽ തകർന്ന ഹെലികോപ്റ്ററിന്റെ ഫ്ലൈറ്റ് ഡേറ്റ റെക്കോർഡർ (എഫ്ഡിആർ) കണ്ടെത്തി. ഡാറ്റ റെക്കോര്‍ഡറിന്റെ പരിശോധന എത്രയും വേഗം നടത്തുമെന്നാണ് സേന വൃത്തങ്ങൾ വ്യക്തമാക്കുന്നത്.

സ്ഥലത്ത് എത്തിയ എയർ ചീഫ് മാർഷൽ വിവേക് റാം ചൗധരി സേനാ ഉദ്യോഗസ്ഥരുമായും പരിശോധക സംഘവുമായും ആശയവിനിമയം നടത്തി.

അപകടമുണ്ടായതിന് പിന്നാലെ സംഭവത്തിൽ വിശദമായ അന്വേഷണം നടത്തുമെന്ന് വ്യോമസേന പ്രഖ്യാപിച്ചിരുന്നു. അപകടം ഉണ്ടാകാനുള്ള എല്ലാ സാദ്ധ്യതകളും അന്വേഷണസംഘം പരിശോധിക്കുന്നുണ്ട്.

അതേസമയം ഹെലികോപ്റ്റർ മരത്തിലിടിച്ചുവെന്ന് ചില ദൃക്‌സാക്ഷികൾ പറഞ്ഞതായി വിവരമുണ്ടായിരുന്നു. പ്രതികൂല കാലാവസ്ഥ, വിമാനത്തിന് സാങ്കേതിക തകരാർ സംഭവിച്ചോ, പൈലറ്റിന്റെ പിഴവ്, അട്ടിമറി സാധ്യത തുടങ്ങി എല്ലാ വശങ്ങളും അന്വേഷണ സംഘം പരിശോധിക്കുമെന്നാണ് വിവരം.

കഴിഞ്ഞ ദിവസം ഉച്ചയ്ക്ക് 12.20-ഓടെയാണ് സംയുക്ത സേനാ മേധാവി ബിപിന്‍ റാവത്തും സംഘവും സഞ്ചരിച്ച ഹെലികോപ്റ്റര്‍ നീലഗിരി കൂനൂരിനടുത്ത് അപകടത്തില്‍പ്പെട്ടത്.

സൂലൂരില്‍നിന്ന് ഊട്ടി വെല്ലിങ്ടണിലെ സൈനിക ക്യാമ്പിലേക്ക് പുറപ്പെട്ടതായിരുന്നു സംഘം. എന്നാല്‍ കൂനൂരിനടുത്ത കാട്ടേരിയില്‍ ഹെലികോപ്റ്റര്‍ തകര്‍ന്നുവീഴുകയായിരുന്നു.

ബിപിൻ റാവത്തും ഭാര്യയും അടക്കം 13 പേരാണ് ഹെലിക്കോപ്റ്റർ അപകടത്തിൽ മരിച്ചത്. സുലൂരിലെ വ്യോമതാവളത്തിൽ നിന്നും വെല്ലിംഗ്ടണ്ണിലുള്ള ഡിഫൻസ് സർവ്വീസ് കോളേജിലേക്കുള്ള യാത്രക്കിടെയാണ് അപകടം.

നീലഗിരിയിലെ കുനൂർ കട്ടേരിക്ക് സമീപമാണ് അപകടമുണ്ടായത്. വ്യോമസേനയുടെ MI ശ്രേണിയിലുള്ള 17v5 ഹെലികോപ്ടറാണ് അപകടത്തിൽപ്പെട്ടത്.

ഭാര്യ മധുലിക റാവത്ത്, ബ്രിഗേഡിയർ എൽഎസ് ലിഡർ, ലെഫ്. കേണൽ ഹർജീന്ദർ സിംഗ്, നായ്ക് ഗുർസേവക് സിംഗ്, നായ്ക് ജിതേന്ദ്ര കുമാർ, ലാൻഡ്സ് നായ്ക് വിവേക് കുമാർ, ലാൻഡ്സ് നായ്ക് ബി. സായി തേജ, ഹവിൽദാർ സത്പാൽ എന്നിവരാണ് ഹെലികോപ്ടറിലുണ്ടായിരുന്നത്. അപകടത്തിൽപ്പെട്ടവരിൽ ഗ്രൂപ്പ് ക്യാപ്റ്റൻ വരുൺ സിങ് മാത്രമാണ് അപകടത്തിൽ നിന്ന് രക്ഷപെട്ടത്.