ദില്ലി : ചൈനീസ് വിദേശകാര്യ മന്ത്രി വാങ് യി ഭാരതത്തിലേക്ക്. ഷാങ്ഹായ് കോര്പ്പറേഷന് ഓര്ഗനൈസേഷന് ഉച്ചകോടിയില് പങ്കെടുക്കാന് ടിയാന്ജിനിലേക്ക് പ്രധാനമന്ത്രി നരേന്ദ്രമോദി നടത്താനിരിക്കുന്ന യാത്രയ്ക്ക് മുന്നോടിയായാണ് ചൈനീസ് വിദേശകാര്യമന്ത്രിയുടെ സന്ദര്ശനം. ചൈനീസ് പ്രസിഡന്റ് ഷി ജിന്പിംഗ്, റഷ്യന് പ്രസിഡന്റ് വ്ളാഡിമിര് പുതിന് തുടങ്ങിയവരും പ്രധാനമന്ത്രിയ്ക്കൊപ്പം ഉച്ചകോടിയില് പങ്കെടുക്കും. ഇന്ത്യയും ചൈനയും തമ്മിലുള്ള അതിര്ത്തി പ്രശ്നത്തെക്കുറിച്ച് ദേശീയ സുരക്ഷാ ഉപദേഷ്ടാവ് അജിത് ഡോവലുമായി ചര്ച്ച നടുത്തുകയാണ് വാങ് യിയുടെ പ്രധാന ഉദ്ദേശമെന്നാണ് വിവരം. .
അതേസമയം ഗാൽവാൻ താഴ്വരയിലെ സംഘർഷത്തെ തുടർന്ന് പൂർണ്ണമായും വഷളായ ഇന്ത്യ-ചൈന നയതന്ത്ര ബന്ധത്തിൽ മഞ്ഞുരുകുകയാണ്. ഇരുരാജ്യങ്ങളും തമ്മിലുള്ള ബന്ധം സാധാരണ നിലയിലേക്ക് മടങ്ങുന്നതിന്റെ ഭാഗമായി, ഇന്ത്യ ചൈനയിലേക്ക് വിമാന സർവീസുകൾ പുനരാരംഭിക്കാൻ ഒരുങ്ങുന്നതായും, ഇന്ത്യയിലേക്കുള്ള യൂറിയ കയറ്റുമതിയിൽ ചൈന ഇളവുകൾ നൽകിയതായും റിപ്പോർട്ടുകൾ സൂചിപ്പിക്കുന്നു.
ചൈനീസ് പൗരന്മാർക്ക് വിനോദസഞ്ചാര വിസകൾ അനുവദിക്കുന്നതിൽ ഏർപ്പെടുത്തിയിരുന്ന നിയന്ത്രണങ്ങൾ ഇന്ത്യ നീക്കിയിരുന്നു. ഇതിന് പിന്നാലെയാണ്, എയർലൈൻ കമ്പനികൾക്ക് ചൈനയിലേക്ക് നേരിട്ടുള്ള വിമാന സർവീസുകൾ പുനരാരംഭിക്കാൻ വ്യോമയാന മന്ത്രാലയം നിർദ്ദേശം നൽകിയിരിക്കുന്നത്. കോവിഡ് മഹാമാരിയുടെ സമയത്ത് നിർത്തിവെച്ച വിമാന സർവീസുകൾ, 2020-ലെ ഗാൽവാൻ സംഘർഷത്തോടെ പൂർണ്ണമായും നിലയ്ക്കുകയായിരുന്നു.
ഇന്ത്യയുടെ ഈ നടപടികളോട് ക്രിയാത്മകമായാണ് ചൈന പ്രതികരിക്കുന്നതെന്നാണ് സൂചന. ഇന്ത്യക്ക് ഏറെ ആവശ്യമുള്ള യൂറിയ രാസവളത്തിന്റെ കയറ്റുമതിക്ക് ഏർപ്പെടുത്തിയിരുന്ന കർശന നിയന്ത്രണങ്ങളിൽ ചൈന ഇളവ് വരുത്തിയതായാണ് ഏറ്റവും പുതിയ റിപ്പോർട്ട്. ഇത് ഇരുരാജ്യങ്ങളും തമ്മിലുള്ള വ്യാപാര ബന്ധം മെച്ചപ്പെടുത്തുന്നതിലെ ഒരു സുപ്രധാന ചുവടുവെപ്പായാണ് വിലയിരുത്തപ്പെടുന്നത്.
നയതന്ത്ര, വ്യാപാര രംഗത്തെ ഈ മാറ്റങ്ങൾ സൈനിക തലത്തിലുള്ള ധാരണകളുടെ തുടർച്ചയാണ്. 2024 ഒക്ടോബറിൽ നടന്ന ചർച്ചകളെ തുടർന്ന്, സംഘർഷ മേഖലകളിൽ നിന്ന് സൈന്യത്തെ പിൻവലിച്ച് 2020-ന് മുമ്പുള്ള സ്ഥിതിയിലേക്ക് മടങ്ങാൻ ഇരുരാജ്യങ്ങളും തീരുമാനിച്ചിരുന്നു. ചില മേഖലകളിൽ ഈ സൈനിക പിന്മാറ്റം പൂർത്തിയാകാനുണ്ടെങ്കിലും, നയതന്ത്ര തലത്തിലുള്ള പുതിയ നീക്കങ്ങൾ സമ്പൂർണ്ണ സമാധാന ശ്രമങ്ങൾക്ക് കരുത്തേകുമെന്നാണ് വിലയിരുത്തൽ.
