ചിങ്ങമാസ പൂജ: ശബരിമല ദർശനത്തിന് വെർച്വൽ ക്യൂ ബുക്കിംഗ് ആരംഭിച്ചു

പത്തനംതിട്ട: ചിങ്ങമാസ പൂജകൾക്കായി ശബരിമല നട തുറക്കുന്നതിന് മുന്നോടിയായി, ദർശനത്തിനായി വെർച്വൽ ക്യൂ ബുക്കിംഗ് ഇന്ന് (02/08/2025) വൈകുന്നേരം 5 മണി മുതൽ ആരംഭിച്ചു. ശബരിമലയുടെ ഔദ്യോഗിക വെബ്സൈറ്റായ www.sabarimalaonline.org വഴി ഭക്തർക്ക് ദർശനത്തിനുള്ള സ്ലോട്ടുകൾ ബുക്ക് ചെയ്യാം.

ദർശനത്തിനായുള്ള ബുക്കിംഗ് സ്ലോട്ടുകൾക്കൊപ്പം സന്നിധാനത്ത് താമസിക്കുന്നതിനുള്ള മുറികളുംഓൺലൈനായി ബുക്ക് ചെയ്യാൻ സാധിക്കുമെന്ന് തിരുവിതാംകൂർ ദേവസ്വം ബോർഡ് അധികൃതർ അറിയിച്ചു. ചിങ്ങമാസ പൂജകൾക്കായി ആഗസ്റ്റ് 16-ന് വൈകുന്നേരം 5 മണിക്ക് നട തുറക്കും. തുടർന്ന് അഞ്ച് ദിവസത്തെ പൂജകൾക്ക് ശേഷം ആഗസ്റ്റ് 21-ന് രാത്രി 10 മണിക്ക് നട അടയ്ക്കും. തിരക്ക് ഒഴിവാക്കി സുഗമമായ തീർത്ഥാടനം ഉറപ്പാക്കുന്നതിന് ആവശ്യമായ എല്ലാ ക്രമീകരണങ്ങളും പൂർത്തിയാക്കിയതായി അധികൃതർ അറിയിച്ചു.