അക്വേറിയം മത്സ്യത്തിന്‍റെ സങ്കടത്തില്‍ ചങ്ക് പൊള്ളി സോഷ്യല്‍ മീഡിയ !

കരയിലുള്ളതിനേക്കാള്‍ ഏറെയാണ് കടല്‍ ജീവികള്‍. അവയില്‍ മിക്കതിനെയും ഇനിയും മനുഷ്യന്‍ രേഖപ്പെടുത്തിയിട്ടില്ലെന്നതാണ് യാഥാര്‍ത്ഥ്യം. അത് പോലെ തന്നെയാണ് ആമസോണ്‍ കാടുകളും. അതേസമയം അജ്ഞാതമായ ജീവികളുടെ ചിത്രങ്ങളും വീഡിയോകളും സാമൂഹിക മാധ്യമങ്ങളില്‍ ലോകത്തിന്‍റെ പലഭാഗങ്ങളില്‍ നിന്നും, ഇടയ്ക്കിടെ പ്രത്യക്ഷപെടാറുണ്ട്. കഴിഞ്ഞ ദിവസം ആർക്കെങ്കിലും ഈ മത്സ്യത്തെ തിരിച്ചറിയാൻ കഴിയുമോ എന്ന ചോദ്യത്തോടെ unilad എന്ന ഇന്‍സ്റ്റാഗ്രാം അക്കൗണ്ടിലൂടെ പങ്കുവച്ച വീഡിയോ ഏറെപ്പേരുടെ കാഴ്ചയില്‍ ഉടക്കിയിരിക്കുകയാണ്. വീഡിയോയില്‍ ഒരു അക്വേറിയത്തില്‍ നിന്നുള്ള ദൃശ്യങ്ങളായിരുന്നു ഉണ്ടായിരുന്നത്. വൈറലായ വീഡിയോയുടെ ദൃശ്യങ്ങളിലേക്ക്.

അക്ക്വേറിയത്തിനുള്ളില്‍ നീന്തിക്കൊണ്ടിരുന്ന കുഞ്ഞു മത്സ്യത്തിന് മഞ്ഞ നിറമായിരുന്നു. ശരീരത്തിന്‍റെ വലുപ്പവുമായി താരതമ്യപ്പെടുത്തുമ്പോള്‍ അതിന്‍റെ കണ്ണുകള്‍ക്ക് അസാമാന്യ വലുപ്പം കാണാം. കണ്ണുകള്‍ക്കിടയില്‍ വളരെ ചെറിയ വായും ആയിരുന്നു ആ കുഞ്ഞു മത്സ്യത്തിനുണ്ടായിരുന്നത്. മത്സ്യത്തിന്‍റെ മുഖത്തുള്ള ഈ പ്രകടമായ വ്യാത്യാസം അതിന്‍റെ മുഖത്തിന് ഒരു വിഷാദഭാവം നല്‍കുന്നു. മത്സ്യം ഇപ്പോള്‍ കരയുമോ എന്ന് പോലും കാഴ്ചക്കാരന് തോന്നാം. മുഖം ഒഴിച്ചുള്ള മറ്റ് ശരീരഭാഗങ്ങളെല്ലാം സാധാരണ മത്സ്യങ്ങളെ പോലെതന്നെയാണ്. മത്സ്യത്തെ കുറിച്ചുള്ള അന്വേഷണം കാഴ്ചക്കാര്‍ ഏറ്റെടുക്കുകയും നിരവധി പേര്‍ തങ്ങളുടെ മനോധര്‍മ്മത്തിന് അനുസരിച്ചുള്ള പേരുകള്‍ നിർദേശിക്കുകയും ചെയ്തു. നിരവധി പേര്‍ എഴുതിയത് അത് ബ്രീഡ് ചെയ്യപ്പെട്ട മത്സ്യമാണെന്നാണ്.