സിഐയെ കണ്ടെത്തി ; വയനാട്ടിൽ കാണാതായ സിഐയെ തിരുവനന്തപുരത്ത് നിന്ന് കണ്ടെത്തി,കൂടുതൽ അന്വേഷണവുമായി പോലീസ്

തിരുവനന്തപുരം : വയനാട്ടിൽ കാണാതായ സിഐയെ തിരുവനന്തപുരത്ത് നിന്നും കണ്ടെത്തി. പനമരം പോലീസ് സ്‌റ്റേഷനിലെ ഹൗസ് ഓഫീസറായ ഇൻസ്‌പെക്ടർ കെ എ എലിസബത്തിനെ ആണ്
പോലീസ് കണ്ടെത്തിയത്.

തിങ്കളാഴ്ച മുതലാണ് എലിസബത്തിനെ കാണാതായത്. പാലക്കാട് ഫാസ്റ്റ് ട്രാക്ക് കോടതിയിലേക്ക് ഔദ്യോഗിക ആവശ്യത്തിനായി പോയതായിരുന്നു ഇവർ. അവസാനമായി സംസാരിച്ച വ്യക്തിയോട് കൽപ്പറ്റയിലാണെന്നും ഇവർ പറഞ്ഞിരുന്നു. ഇതിന് പിന്നാലെ ഇവരെ കാണാതാവുകയായിരുന്നു.
തിങ്കളാഴ്ച രാത്രി പത്തരയോടെ കോഴിക്കോടുള്ള ഒരു എടിഎം കൗണ്ടറിൽ നിന്നും ഇവർ പണം പിൻവലിച്ചിരുന്നു.പിന്നീട് മാനാഞ്ചിറയിൽ നിന്ന് പാലക്കാട് ബസിൽ കയറി പോകുകയായിരുന്നു. ഇതിന്റെ സിസിടിവി ദൃശ്യങ്ങൾ പോലീസിന് ലഭിച്ചിട്ടുണ്ട്. എന്നാൽ ഉദ്യോഗസ്ഥ എന്തിനാണ് തിരുവനന്തപുരത്ത് പോയത് എന്ന കാര്യം വ്യക്തമല്ല.