സിറിയയിൽ ഇസ്ലാമിക വിഭാഗങ്ങൾ ചേരിതിരിഞ്ഞ് തമ്മിലടി; സംഘർഷങ്ങളിൽ മരണം ആയിരം കടന്നതായി ബ്രിട്ടീഷ് സംഘടന; പ്രതികാരക്കൊല തുടർന്ന് സുന്നി ഗ്രൂപ്പുകൾ

ഡമാസ്കസ്: സിറിയയിൽ ഇസ്ലാമിക വിഭാഗങ്ങൾ തമ്മിലുള്ള ആഭ്യന്തര സംഘർഷം രൂക്ഷം. സംഘർഷങ്ങളിൽ മരണം 1000 കടന്നതായി ബ്രിട്ടീഷ് മനുഷ്യാവകാശ സംഘടനാ പുറത്തുവിട്ട റിപ്പോർട്ടുകളിൽ പറയുന്നു. സുരക്ഷാ സൈന്യവും പുറത്താക്കപ്പെട്ട മുൻ പ്രസിഡന്റ് ബാഷർ അസദിന്റെ അനുയായികളും തമ്മിലാണ് സംഘർഷം. 745 സിവിലിയന്മാരും 125 സുരക്ഷാ സൈനികരും വിമത സായുധ വിഭാഗത്തിലെ 148 പേരും കൊല്ലപ്പെട്ടതായാണ് കണക്ക്.

കുടിവെള്ളവും വൈദ്യുതിയും അടക്കമുള്ളവ പലമേഖലകളിലും വിച്ഛേദിച്ചിരിക്കുന്നു. സംഘർഷങ്ങളെ തുടർന്ന് കടകമ്പോളങ്ങൾ അടഞ്ഞു കിടക്കുകയുമാണ്. വിമത വിഭാഗത്തിന്റെ ആക്രമണങ്ങളെ പ്രതിരോധിക്കുക മാത്രമാണ് സൈന്യം ചെയ്യുന്നതെന്ന് സർക്കാർ അറിയിച്ചു. സിറിയയുടെ ചരിത്രത്തിലെ തന്നെ ഏറ്റവും വലിയ ആഭ്യന്തര സംഘർഷമാണ് നടക്കുന്നത്. അസദിനെ പുറത്താക്കി നിലവിൽ വന്ന സർക്കാരിന് ഈ സംഘർഷം വലിയ വെല്ലുവിളി സൃഷ്ടിക്കുകയുമാണ്.

നഗ്നരായി നിരത്തിലൂടെ നടക്കാന്‍ നിര്‍ബന്ധിതരാക്കി സ്ത്രീകളെ വെടിവെച്ചു കൊല്ലുകയാണെന്നും റിപ്പോര്‍ട്ടില്‍ പറയുന്നു. പുതിയ സര്‍ക്കാരിനോട് കൂറു പുലര്‍ത്തുന്ന സുന്നി പടയാളികളാണ് അസ്സദിനെ പിന്തുണക്കുന്ന അലാവൈറ്റ് വിഭാഗത്തിന് നേരെ ആദ്യമായി അക്രമം അഴിച്ചു വിട്ടതെന്ന് ഡെയ്ലി മെയില്‍ റിപ്പോര്‍ട്ട് ചെയ്യുന്നു. പലയിടങ്ങളിലും നിരത്തുകളിലും വീടുകള്‍ക്കുള്ളിലും മൃതദേഹങ്ങള്‍ ചിതറിക്കിടക്കുകയാണെന്നും റിപ്പോര്‍ട്ടുകളില്‍ പറയുന്നു.

ചിലയിടങ്ങളില്‍ മൃതദേഹങ്ങള്‍ അടക്കം ചെയ്യുന്നതിനെ അക്രമികള്‍ തടയുകയും ചെയ്യുന്നുണ്ട്.അതേസമയം അക്രമം അതിന്റെ മൂര്‍ദ്ധന്യതയിലെത്തിയ ബനിയാസ് നഗരത്തില്‍ പലരും പലായനം ചെയ്യുകയാണ്. അസ്സാദ് സര്‍ക്കാര്‍ ചെയ്ത ക്രൂരതകള്‍ക്കുള്ള പ്രതികാരമായാണ് അലവൈറ്റ് സമൂഹത്തെ ആക്രമിക്കുന്നത് എന്നാണ് വിവരം .ഷിയ മുസ്ലീങ്ങളിലെ ചെറുവിഭാ​ഗമായ അലവികൾ തിങ്ങിപ്പാർക്കുന്ന ലതാകിയ പ്രവിശ്യയിലാണ്‌ സൈന്യവും എച്ച്‌ടിഎസ്‌ അനുയായികളും കൂട്ടക്കൊല തുടരുന്നത്. കഴിഞ്ഞ വർഷം അവസാനം പുറത്താക്കപ്പെട്ട ബഷാർ അൽ- അസദിനെ പിന്തുണയ്ക്കുന്നവരുടെ ശക്തികേന്ദ്രമാണ് ലതാകിയ പ്രവിശ്യ. ലതാകിയയ്ക്ക് പുറമേ ടാർട്ടസ് ഗവർണറേറ്റിലും നിരവധിപേരെ വധിച്ചതായി റിപ്പോർട്ടുണ്ട്‌. സൈന്യവും സർക്കാർ അനുകൂല ആയുധധാരികളും വീടുകളും സ്വത്തുക്കളും കൊള്ളയടിക്കുകയാണെന്ന് മനുഷ്യാവകാശ സംഘടനകൾ വെളിപ്പെടുത്തി.