ബംഗാളിൽ റീപോളിങ്ങിനിടെ സംഘർഷം; അക്രമം അഴിച്ചുവിട്ട് തൃണമൂൽ ഗുണ്ടകൾ! വോട്ടർമാരെ തടഞ്ഞതായി പരാതി

പശ്ചിമ ബംഗാളിലെ സൗത്ത് 24 പർഗാനാസ് ജില്ലയിൽ നടന്ന റീപോളിങ്ങിനിടെ തൃണമൂൽ കോൺഗ്രസ് പ്രവർത്തകർ വ്യാപക അക്രമം അഴിച്ചുവിട്ടതായി റിപ്പോർട്ട്. മഗ്രാഹത് പശ്ചിം, ഡയമണ്ട് ഹാർബർ മണ്ഡലങ്ങളിലെ 15 പോളിംഗ് സ്റ്റേഷനുകളിലാണ് ഇന്ന് വീണ്ടും വോട്ടെടുപ്പ് നടന്നത്. ഏപ്രിൽ 29-ന് നടന്ന വോട്ടെടുപ്പിൽ വ്യാപകമായ ക്രമക്കേടുകൾ നടന്നതായി തെരഞ്ഞെടുപ്പ് കമ്മീഷൻ കണ്ടെത്തിയതിനെ തുടർന്നാണ് ഈ ബൂത്തുകളിലെ വോട്ടെടുപ്പ് അസാധുവായി പ്രഖ്യാപിച്ചതും റീപോളിംഗ് നടത്തുന്നതും. രാവിലെ 7 മണിക്ക് ആരംഭിച്ച വോട്ടെടുപ്പ് വൈകുന്നേരം 6 മണി വരെ കനത്ത സുരക്ഷാ സന്നാഹങ്ങളോടെയാണ് നടന്നത്. വോട്ടർമാരെ വോട്ട് ചെയ്യുന്നതിൽ നിന്ന് തടഞ്ഞതായും പലയിടത്തും വോട്ടെടുപ്പ് തടസ്സപ്പെട്ടതായും ആരോപണങ്ങൾ ഉയർന്നതോടെ സ്ഥിതിഗതികൾ നിയന്ത്രിക്കാൻ വൻതോതിൽ സുരക്ഷാ സേനയെ വിന്യസിച്ചു.

ഡയമണ്ട് ഹാർബറിലെ ഫാൽറ്റ മേഖലയിൽ വോട്ടിംഗ് മെഷീനുകളിൽ കൃത്രിമം നടന്നതായും വോട്ടർമാരെ തടഞ്ഞതായും ബിജെപി നേതാക്കൾ ആരോപിച്ചു. വോട്ടിംഗ് മെഷീനുകളിൽ ബിജെപിയുടെ ചിഹ്നത്തിന് മുകളിൽ ടേപ്പ് ഒട്ടിച്ച് വോട്ട് ചെയ്യുന്നത് തടസ്സപ്പെടുത്തിയെന്നാണ് പ്രധാന പരാതി. മുഖ്യമന്ത്രി മമത ബാനർജിയുടെ അനന്തരവൻ അഭിഷേക് ബാനർജി മത്സരിക്കുന്ന മണ്ഡലമായ ഡയമണ്ട് ഹാർബറിൽ തൃണമൂൽ കോൺഗ്രസ് ക്രിമിനൽ പശ്ചാത്തലമുള്ളവരെ ഉപയോഗിച്ച് ജനാധിപത്യത്തെ അട്ടിമറിക്കുകയാണെന്ന് ബിജെപി ഐടി സെൽ മേധാവി അമിത് മാളവ്യ എക്സിൽ കുറിച്ചു. സംഭവത്തെക്കുറിച്ച് റിപ്പോർട്ടുകൾ ലഭിച്ചിട്ടുണ്ടെന്നും പരിശോധനയ്ക്ക് ശേഷം കുറ്റക്കാർക്കെതിരെ നടപടിയെടുക്കുമെന്നും പശ്ചിമ ബംഗാൾ ചീഫ് ഇലക്ടറൽ ഓഫീസർ മനോജ് കുമാർ അഗർവാൾ അറിയിച്ചു.

മഗ്രാഹത് പശ്ചിമിലെ 11 ബൂത്തുകളിലും ഡയമണ്ട് ഹാർബറിലെ നാല് ബൂത്തുകളിലുമാണ് റീപോളിംഗ് നടന്നത്. റിട്ടേണിംഗ് ഓഫീസർമാരും തെരഞ്ഞെടുപ്പ് നിരീക്ഷകരും സമർപ്പിച്ച റിപ്പോർട്ടുകളുടെ അടിസ്ഥാനത്തിൽ പീപ്പിൾസ് റെപ്രസന്റേഷൻ ആക്ട് 1951 പ്രകാരമാണ് കമ്മീഷൻ തീരുമാനമെടുത്തത്. സംഘർഷസാധ്യത കണക്കിലെടുത്ത് സെൻട്രൽ ഫോഴ്സിനെ സെൻസിറ്റീവ് ബൂത്തുകളിൽ വിന്യസിച്ചിരുന്നു. സംസ്ഥാനത്ത് നടന്ന അവസാന ഘട്ട വോട്ടെടുപ്പിൽ 90 ശതമാനത്തിനടുത്ത് പോളിംഗ് രേഖപ്പെടുത്തിയിരുന്നു. മെയ് 4-ന് വോട്ടെണ്ണൽ നടക്കാനിരിക്കെ ഹൗറ ഉൾപ്പെടെയുള്ള ജില്ലകളിലെ സ്‌ട്രോങ്ങ് റൂമുകളിൽ കനത്ത സുരക്ഷയാണ് ഏർപ്പെടുത്തിയിരിക്കുന്നത്. ബംഗാളിലെ രാഷ്ട്രീയ സാഹചര്യം ഏറെ പ്രക്ഷുബ്ധമായി തുടരുന്നതിനിടെ പുറത്തുവരുന്ന ഈ സംഘർഷ വാർത്തകൾ വലിയ ആശങ്കയ്ക്കാണ് വഴിതെളിക്കുന്നത്.