പരക്കം പാഞ്ഞ് കോൺഗ്രസ്സ് ; നാഷണൽ ഹെറാൾഡ് കേസിൽ കോൺഗ്രസ്സിനെ വരിഞ്ഞു മുറുക്കി ഇഡി ; 751.9 കോടി രൂപയുടെ സ്വത്തുക്കൾ കണ്ടുകെട്ടി

ദില്ലി : നാഷണൽ ഹെറാൾഡ് അഴിമതിക്കേസിൽ സുപ്രധാന നീക്കവുമായി എൻഫോഴ്സ്മെന്റ് ഡയറക്ടറേറ്റ്. അസോസിയേറ്റഡ് ജേണൽസ് ലിമിറ്റഡിന്റെയും യങ് ഇന്ത്യയുടെയും ഉടമസ്ഥതയിലുള്ള 751.9 കോടി രൂപയുടെ സ്വത്തുക്കൾ ഇഡി കണ്ടുകെട്ടി. രാഹുൽ ഗാന്ധിയും സോണിയാഗാന്ധിയും ബന്ധപ്പെട്ട കള്ളപ്പണം വെളുപ്പിക്കൽ കേസിലാണ് നടപടി.

അസോസിയേറ്റഡ് ജേണൽസ് ലിമിറ്റഡിന്റെ 661 കോടി രൂപയുടെ ആസ്തിയാണ് ദില്ലിയിലും മുംബൈയിലും ലഖ്നൗവിൽ നിന്നുമായി ഇഡി കണ്ടുകെട്ടിയത്. ഇക്വിറ്റി ഷെയറുകളുടെ രൂപത്തിലാണ് യങ് ഇന്ത്യയുടെ ആസ്തി കണ്ടുകെട്ടിയിരിക്കുന്നത്. ഇത്തരത്തിൽ കണ്ടുകെട്ടിയിരിക്കുന്നത് 90.21 കോടി രൂപയുടെ ആസ്തിയാണ്.

2016 ജൂൺ 26ന് സ്വകാര്യ അന്യായത്തിന്റെ അടിസ്ഥാനത്തിൽ ദില്ലി മെട്രോപൊളിറ്റൻ മജിസ്ട്രേറ്റ് കോടതിയുടെ നിർദ്ദേശപ്രകാരമാണ് നാഷണൽ ഹെറാൾഡ് ഇടപാടിലെ കള്ളപ്പണം വെളുപ്പിക്കൽ കേസ് ഇഡി ഏറ്റെടുക്കുന്നത്. കേസിൽ യങ് ഇന്ത്യ അധികൃതർ ഉൾപ്പെടെയുള്ള പ്രതികൾ സാമ്പത്തിക കുറ്റകൃത്യത്തിൽ ഏർപ്പെട്ടതായി ഇഡി കോടതിയിൽ വ്യക്തമാക്കി. നൂറ് കണക്കിന് കോടി രൂപയുടെ മൂല്യമുള്ള അസോസിയേറ്റഡ് ജേണൽസിന്റെ സ്വത്തുക്കൾ കൈക്കലാക്കാൻ പ്രതികൾ ക്രിമിനൽ ഗൂഢാലോചന നടത്തിയതായും ഇഡി കണ്ടെത്തിയിരുന്നു.