ആര്‍ക്കും എന്നെ തൊടാനാവില്ല; കോടതിക്കെതിരെ വിമർശനങ്ങളുമായി വിവാദ ആൾദൈവം നിത്യാനന്ദ

ന്യൂഡല്‍ഹി: ലോകത്തുള്ള ആര്‍ക്കും തന്നെ തൊടാന്‍ സാധിക്കില്ലെന്നും ഒരു കോടതിക്കും തന്നെ പ്രോസിക്യൂട്ട് ചെയ്യാന്‍ സാധിക്കില്ലെന്നുമായി വിവാദ ആള്‍ദൈവം നിത്യാനന്ദ. സോഷ്യല്‍ മീഡിയയില്‍ വ്യാപകമായി പ്രചരിക്കുന്ന ഒരു വീഡിയോയിലൂടെയാണ് നിത്യാനന്ദ ഈ വീരവാദം മുഴക്കിയിരിക്കുന്നത്.
നിരവധി ബലാത്സംഗ കേസുകളില്‍ ഉള്‍പ്പെടെ പ്രതിയാണ് നിത്യാനന്ദ.

‘സത്യവും യാഥാര്‍ത്ഥ്യവും തുറന്നുകാട്ടി നിങ്ങള്‍ക്ക് മുൻപിൽ ഞാന്‍ എന്റെ സത്യസന്ധത തെളിയിക്കും. എന്നെ ആര്‍ക്കും തൊടാന്‍ സാധിക്കില്ല. സത്യം വെളിപ്പെടുത്തുന്നതിനായി ഒരു മണ്ടന്‍ കോടതിക്കും എന്നെ പ്രോസിക്യൂട്ട് ചെയ്യാനും സാധിക്കില്ല. എനിക്ക് നിങ്ങളോട് സത്യം പറയാന്‍ സാധിക്കും, ഞാന്‍ പരമ ശിവനാണ്’ എന്നാണ് വീഡിയോയില്‍ ആൾദൈവം പറഞ്ഞിരിക്കുന്നത്.
ഇക്വഡോറില്‍ നിന്ന് വാങ്ങിയ ദ്വീപില്‍ കൈലാസ എന്ന ഹിന്ദു രാജ്യം സ്ഥാപിച്ചതായി നിത്യാനന്ദ പറഞ്ഞിരുന്നു.’ഭൂമിയിലെ മഹത്തായ ഹിന്ദു രാജ്യം’ എന്നാണ് കൈലാസയെ കുറിച്ച്‌ നിത്യാനന്ദ വെബ്സൈറ്റില്‍ അവകാശപ്പെട്ടിരുന്നത്.

ബലാത്സംഗ കേസില്‍ അറസ്റ്റ് ഉണ്ടാവുമെന്ന് ഉറപ്പായ സാഹചര്യത്തിലാണ് പാസ്‌പോര്‍ട്ട് പോലുമില്ലാത്ത നിത്യാനന്ദ ഇന്ത്യ വിട്ടത്. ഇക്കാര്യം ഗുജറാത്ത് പോലിസ് നേരത്തെ തന്നെ സ്ഥിരീകരിച്ചിരുന്നു. ഇയാളുടെ പാസ്‌പോര്‍ട്ടിന്റെ കാലാവധി 2018 സെപ്തംബറില്‍ അവസാനിച്ചിരുന്നു. രണ്ടു പെൺകുട്ടികളെ തട്ടിക്കൊണ്ടുപോയി നിത്യാനന്ദയുടെ ആശ്രമത്തിൽ അനധികൃതമായി തടവില്‍ പാര്‍പ്പിച്ചുവെന്ന കേസില്‍ നിത്യാനന്ദയ്‌ക്കെതിരെ പോലീസ് അന്വേഷണം നടന്നുകൊണ്ടിരിക്കെയാണ് വിവാദ വീഡിയോയുമായി നിത്യാനന്ദ രംഗത്തെത്തിയിരിക്കുന്നത്.