മലപ്പുറം:കുനിയില് ഇരട്ടക്കൊലക്കേസില് 12 പ്രതികള് കുറ്റക്കാരെന്ന് വ്യക്തമാക്കി കോടതി. മഞ്ചേരി മൂന്നാം അഡീഷണല് ജില്ലാ സെഷന്സ് കോടതിയാണ് പ്രതികളുടെ വിചാരണ നടത്തിയത്.പ്രതികൾക്കുള്ള ശിക്ഷ ഈ മാസം 19 ന് വിധിക്കും.അരീക്കോട് കുനിയില് കൊളക്കാടന് അബൂബക്കറേയും സഹോദരന് അബ്ദുള് കലാമിനേയും വെട്ടിക്കൊലപ്പെടുത്തിയ കേസിലാണ് വിധി. കുനിയില് അങ്ങാടിയില് വെച്ച് സഹോദരങ്ങളെ മുഖം മൂടി ധരിച്ച പ്രതികള് വെട്ടിയും കുത്തിയും കൊലപ്പെടുത്തിയെന്നാണ് കേസ്.
2012 ജൂണ് 10നാണ് കേസിനാസ്പദമായ സംഭവം. ലീഗ് പ്രവര്ത്തകന് ആയിരുന്ന അതീഖ് റഹ്മാന് വധക്കേസില് പ്രതിചേര്ക്കപ്പെട്ട കൊളക്കാടന് അബൂബക്കര് (കുഞ്ഞാപ്പു), സഹോദരന് അബ്ദുള് കലാം ആസാദ് എന്നിവരെ മുഖംമൂടി ധരിച്ചെത്തിയ മുസ്ലിംലീഗുകാര് നടുറോഡില് വെട്ടിക്കൊലപ്പെടുത്തുകയായിരുന്നുവെന്ന് പൊലീസ് പറയുന്നു.ദൃക്സാക്ഷികളുള്പ്പെടെ 364 സാക്ഷികളാണ് കേസിലുള്ളത്. 273 സാക്ഷികളെ വിസ്തരിച്ചു. കൊലപ്പെടുത്താന് ഉപയോഗിച്ച വടിവാള്, മറ്റ് ആയുധങ്ങള്, പ്രതികളുടെ മൊബൈല് ഫോണ്, വാഹനങ്ങള് ഉള്പ്പെടെ 100 തൊണ്ടിമുതലുകള് കോടതിയില് ഹാജരാക്കിയിരുന്നു.
