ബിപോർജോയ് ചുഴലിക്കാറ്റ് ഗുജറാത്തിൽ നിന്ന് രാജസ്ഥാനിലേക്ക്;രാവിലെ 11 മണിയോടെ വീശിയടിക്കുമെന്ന് നിഗമനം, ദേശീയ ദുരന്ത നിവാരണ സംഘം ഉൾപ്പടെ പ്രദേശത്ത് സജ്ജം

ദില്ലി: അറബിക്കടലിൽ രൂപം കൊണ്ട ബിപോർജോയ് ചുഴലിക്കാറ്റ് ഗുജറാത്തിൽ നിന്നും രാജസ്ഥാനിലേക്ക്.ഇന്ന് രാവിലെ പതിനൊന്ന് മണിയോടെ വീശിയടക്കിക്കുമെന്നാണ് നിഗമനം. ജലോർ , ചനോഡ് , മാർവർ മേഖലയിൽ ആയിരിക്കും ശക്തിയേറുക.40 മുതൽ 50 കിലോമീറ്റർ വേഗതയിൽ വീശുമെന്നാണ് അനുമാനം. ദേശീയ ദുരന്ത നിവാരണ സംഘം ഉൾപ്പടെ പ്രതിരോധത്തിനായുള്ള സേനകൾ പ്രദേശത്ത് സജ്ജമാണ്.ചുഴലിക്കാറ്റ് കടന്നുപോയ ഗുജറാത്തിലെ കച്ച് സൗരാഷ്ട്ര മേഖലയിലും ഇന്ന് കനത്ത മഴയ്ക്ക് സാധ്യതയുണ്ട്.

ഗുജറാത്തില്‍ നിന്ന് ബിപോർജോയ് രാജസ്ഥാനിലേക്ക് നീങ്ങുന്നതിനാല്‍ ഇന്നും നാളെയും രാജസ്ഥാനില്‍ അതിശക്തമായ മഴയും കാറ്റും ഉണ്ടാകുമെന്നാണ് മുന്നറിയിപ്പ് . ബിപോർജോയിയുടെ സ്വാധീനത്താല്‍ ദില്ലിയിലും ഇന്ന് മഴപെയ്തിരുന്നു. ഇന്നും രാജ്യതലസ്ഥാനത്ത് മഴയ്ക്ക് സാധ്യതയുണ്ട്. ചുഴലിക്കാറ്റിന്‍റെ തീവ്രത കുറഞ്ഞെങ്കിലും സഞ്ചാരപാതയില്‍ മഴയും കാറ്റും തുടരുന്നുണ്ട്. ചുഴലിക്കാറ്റിന്‍റെ വേഗത കുറയുകയാണെന്ന് ഐഎംഎഡി ഡയറക്ടർ ജനറല്‍ മൃത്യുഞ്ജയ് മൊഹാപാത്ര പറഞ്ഞു.