ഷര്‍ട്ടൂരി യമുനയില്‍ മുങ്ങാന്‍ ധൈര്യമുണ്ടോ? കെജ്‌രിവാളിനെ വെല്ലുവിളിച്ച് അമിത് ഷാ

ഡല്‍ഹി മുഖ്യമന്ത്രി അരവിന്ദ് കെജ്‌രിവാളിനെ വെല്ലുവിളിച്ച് കേന്ദ്ര ആഭ്യന്തരമന്ത്രി അമിത് ഷാ. യമുനാ നദിയുടെ ശുദ്ധീകരണത്തിനായി സംസ്ഥാന സര്‍ക്കാര്‍ ഒന്നും ചെയ്യുന്നില്ലെന്ന് ആരോപിച്ചാണ് കെജ്‌രിവാളിനെ അമിത് ഷാ വെല്ലുവിളിച്ചത്. നിയമസഭാ തിരഞ്ഞെടുപ്പ് പ്രചാരണ യോഗത്തില്‍ നജഫ്ഗഢിലാണ് അമിത് ഷായുടെ വെല്ലുവിളി.

ധൈര്യമുണ്ടെങ്കില്‍ കുപ്പായമൂരി ഷര്‍ട്ടൂരി മുങ്ങി വരാനായിരുന്നു അമിത് ഷായുശട വെല്ലുവിളി. യമുനയെ സംസ്ഥാന സര്‍ക്കാര്‍ അവഗണിക്കുകയാണ്. യമുനാ നദി ശുദ്ധീകരിച്ചുവെന്നാണ് എഎപി പറയുന്നത്. കെജ്‌രിവാള്‍ നിങ്ങളെ ഞാന്‍ വെല്ലുവിളിക്കുകയാണ്. ധൈര്യമുണ്ടെങ്കില്‍ നിങ്ങള്‍ കുപ്പായമൂരി യമുനയിലൊന്ന് മുങ്ങിനിവരണം. ആ സമയം നദിയിലെ ജലത്തിന്റെ അവസ്ഥ നിങ്ങള്‍ക്ക് ബോധ്യപ്പെടുമെന്ന് അമിത് ഷാ പറഞ്ഞു.

യമുനയെ സംസ്ഥാന സര്‍ക്കാര്‍ അവഗണിക്കുകയാണെന്ന് കുറ്റപ്പെടുത്തിയ അമിത് ഷാ നദീ ശുദ്ധീകരണത്തിനുള്ള ഫണ്ട് സംസ്ഥാന സര്‍ക്കാരിന് കൈമാറുമെന്നും വ്യക്തമാക്കി. മെട്രോ റെയില്‍ നഗരത്തില്‍ കൂടുതല്‍ വ്യാപിപ്പിക്കുമെന്നും അമിത് ഷാ വാഗ്ദാനം നല്‍കി.