വനവാസി യുവാവിന്റെ മരണം; പ്രതികളെ കണ്ടെത്താനായില്ലെന്ന് റിപ്പോര്‍ട്ട് , അന്വേഷണം വേഗത്തിൽ പൂർത്തിയാക്കാൻ നിർദ്ദേശം നൽകി മനുഷ്യാവകാശ കമ്മീഷൻ

കോഴിക്കോട് :മെഡിക്കൽ കോളേജിന് സമീപം ആത്മഹത്യ ചെയ്ത വനവാസി യുവാവ് വിശ്വനാഥന്റെ മരണത്തിൽ ഇതുവരെയും പ്രതികളെ കണ്ടെത്താനായിട്ടില്ല. അന്വേഷണ ഉദ്യോഗസ്ഥനായ എസിപി കെ സുദർശൻ മനുഷ്യാവകാശ കമ്മിഷന് റിപ്പോർട്ട് സമർപ്പിച്ചു. സിസിടിവി ദൃശ്യങ്ങളുടെ ശാസ്ത്രീയ പരിശോധന നടന്നുകൊണ്ടിരിക്കുകയാണെന്നും, കൂടാതെ വിശ്വനാഥന്റെ കുടുംബം ഉന്നയിച്ച ആരോപണങ്ങൾ അന്വേഷിക്കുകയാണെന്നും അന്വേഷണ റിപ്പോർട്ടിൽ പറയുന്നുണ്ട്. അന്വേഷണം വേഗത്തിൽ പൂർത്തിയാക്കാൻ കമ്മീഷൻ നിർദ്ദേശം നൽകി.

അതേസമയം വിശ്വനാഥന്റെ ഷർട്ട് കഴിഞ്ഞ ദിവസം അന്വേഷണത്തിൽ കണ്ടെത്തിയിരുന്നു. ഷിർട്ടിന്റെ പോക്കറ്റിൽ ആകെ കുറച്ച് ചില്ലറ പൈസയും ഒരു കെട്ട് ബീഡിയും മാത്രമായിരുന്നു ഉണ്ടായിരുന്നത്. ഷർട്ട് ഇല്ലാത്തതിനാൽ, യുവാവിനെ കൊന്ന് കെട്ടിത്തൂക്കിയതാണെന്ന് കുടുംബം ആദ്യഘട്ടത്തിൽ ആരോപിച്ചിരുന്നു.