കാശ്മീരി പണ്ഡിറ്റുകൾക്ക് ടെലഗ്രാമിലൂടെ വധഭീഷണി: കേസ് സൈബർ ടെററിസം സെല്ലിന്, സുരക്ഷ ശക്തമാക്കി പോലീസും കേന്ദ്ര ഏജൻസികളും

ശ്രീനഗർ: കാശ്മീരിൽ ജോലി ചെയ്യുന്ന കാശ്മീരി പണ്ഡിറ്റ് ജീവനക്കാർക്ക് നേരെ ടെലഗ്രാം വഴി കൊലവിളി നടത്തിയ സംഭവത്തിൽ അന്വേഷണം ശക്തമാക്കി പോലീസ്. കാശ്മീരി പണ്ഡിറ്റുകളുടെ സ്വകാര്യ വിവരങ്ങൾ ചോർത്തുകയും അവർക്കെതിരെ അക്രമത്തിന് ആഹ്വാനം ചെയ്യുകയും ചെയ്ത ടെലഗ്രാം ചാനലിനെതിരെ ദില്ലി പോലീസിന്റെ സൈബർ ടെററിസം സെല്ലിൽ പരാതി ലഭിച്ചു.

ജീവനക്കാരുടെ പേര്, ഫോൺ നമ്പർ, ജോലി ചെയ്യുന്ന വകുപ്പ്, വീട്ടുപേര്, വിലാസം തുടങ്ങിയ അതീവ വിവരങ്ങളാണ് സോഷ്യൽ മീഡിയയിലൂടെ പുറത്തുവിട്ടത്. ഇതിന് പുറമെ കൊലപാതകവും ആക്രമണങ്ങളും നടത്തണമോ എന്ന് ആരാഞ്ഞുകൊണ്ട് ചാനലിൽ വോട്ടെടുപ്പും സംഘടിപ്പിച്ചിരുന്നു. വിനീത് ജിൻഡാൽ നൽകിയ പരാതിയുടെ അടിസ്ഥാനത്തിൽ അക്കൗണ്ടിന്റെ ഐപി വിലാസവും ഡിജിറ്റൽ ഉറവിടങ്ങളും കേന്ദ്രീകരിച്ച് ഫോറൻസിക് അന്വേഷണം ആരംഭിച്ചിട്ടുണ്ട്.

സംഭവത്തെ തുടർന്ന് ജമ്മു കാശ്മീർ ഭരണകൂടം പ്രദേശത്ത് അടിയന്തര സുരക്ഷാ മുന്നറിയിപ്പ് നൽകി. റവന്യൂ, വിദ്യാഭ്യാസം തുടങ്ങിയ വകുപ്പുകളിൽ ജോലി ചെയ്യുന്ന ന്യൂനപക്ഷ വിഭാഗത്തിലെ ജീവനക്കാരോട് ആഗസ്റ്റ് 25 വരെ വീടുകളിൽ ഇരുന്ന് ജോലി ചെയ്യാൻ വാക്കാൽ നിർദ്ദേശം നൽകിയിട്ടുണ്ട്. പണ്ഡിറ്റ് കോളനികൾക്കും ജീവനക്കാരുടെ താൽക്കാലിക താമസകേന്ദ്രങ്ങൾക്കും ചുറ്റും സുരക്ഷാസേന നിരീക്ഷണം ശക്തമാക്കുകയും പ്രത്യേക പട്രോളിംഗും തിരച്ചിലും ആരംഭിക്കുകയും ചെയ്തിട്ടുണ്ട്.

സംഭവം കടുത്ത ആശങ്ക സൃഷ്ടിച്ച പശ്ചാത്തലത്തിൽ, ഇത് ഭയം സൃഷ്ടിച്ച് ആളുകളെ ഒടുക്കാനുള്ള മനഃശാസ്ത്രപരമായ നീക്കമാണെന്ന് കാശ്മീർ സോൺ ഐജിപി വി.കെ. ബിർദി വ്യക്തമാക്കി. വിഷയം അതീവ ഗൗരവത്തോടെയാണ് കാണുന്നതെന്നും കുറ്റക്കാരെ ഉടൻ കണ്ടെത്തി നിയമത്തിന് മുന്നിൽ കൊണ്ടുവരുമെന്നും സൈബർ ഇന്റലിജൻസ് വിഭാഗം ഡിജിറ്റൽ തെളിവുകൾ പരിശോധിച്ചു വരികയാണെന്നും അദ്ദേഹം കൂട്ടിച്ചേർത്തു.

കശ്മീർ താഴ്‌വരയിൽ നിന്നുള്ള തദ്ദേശീയ ഹിന്ദു ബ്രാഹ്മണ സമൂഹമാണ് കശ്മീരി പണ്ഡിറ്റുകൾ. സമ്പന്നമായ സാംസ്കാരിക പാരമ്പര്യമുള്ള ഈ സമൂഹം പ്രാചീന കാലം മുതൽ വിദ്യാഭ്യാസത്തിനും തത്ത്വചിന്തയ്ക്കും നൽകിയ സംഭാവനകൾ വളരെ വലുതാണ്. ഹൈന്ദവ ആത്മീയതയിലെ കശ്മീർ ശൈവിസം എന്ന തത്ത്വചിന്ത രൂപപ്പെടുത്തുന്നതിൽ പ്രധാന പങ്ക് വഹിച്ച ഇവർ കശ്മീരി ഭാഷയാണ് സംസാരിക്കുന്നത്.
1980-കളുടെ അവസാനത്തിലും 1990-കളുടെ തുടക്കത്തിലും കശ്മീരിൽ രൂക്ഷമായ വിഘടനവാദ ഭീകരതയെ തുടർന്ന് ലക്ഷക്കണക്കിന് കശ്മീരി പണ്ഡിറ്റുകൾക്ക് തങ്ങളുടെ ജന്മനാടും വീടുകളും ഉപേക്ഷിച്ച് പലായനം ചെയ്യേണ്ടി വന്നു. അങ്ങനെ നാടുവിടേണ്ടി വന്ന ഭൂരിഭാഗം ആളുകളും ജമ്മുവിലും ഡൽഹിയിലും ഇന്ത്യയിലെ മറ്റ് നഗരങ്ങളിലുമാണ് പിന്നീട് അഭയം കണ്ടെത്തിയത്. നിലവിൽ കശ്മീർ താഴ്‌വരയിൽ വളരെ കുറച്ചു കുടുംബങ്ങൾ മാത്രമാണ് ജീവിക്കുന്നത്. ഇവരെ സുരക്ഷിതമായി സ്വന്തം നാട്ടിലേക്ക് തിരികെ എത്തിക്കാനുള്ള പുനരധിവാസ ശ്രമങ്ങൾ കേന്ദ്ര സർക്കാർ നടപ്പിലാക്കിവരുന്നുണ്ട്.