പോലീസ് ഹെലികോപ്റ്റർ വാടക വിവരങ്ങൾ നൽകാനാവില്ല! ആർടിഐ അപേക്ഷ തള്ളി സർക്കാർ

തിരുവനന്തപുരം : സംസ്ഥാന പോലീസ് വാടകയ്‌ക്കെടുത്ത ഹെലികോപ്റ്ററുമായി ബന്ധപ്പെട്ട വിവരങ്ങൾ വിവരാവകാശ നിയമപ്രകാരം പുറത്തുവിടാനാകില്ലെന്ന് വ്യക്തമാക്കി സർക്കാർ. സാമൂഹ്യപ്രവർത്തകനായ രാജു വാഴക്കാല നൽകിയ അപേക്ഷയ്ക്ക് മറുപടിയായി സംസ്ഥാന പോലീസ് ആസ്ഥാനത്തു നിന്നാണ് ഈ അറിയിപ്പ് ലഭിച്ചത്. ഹെലികോപ്റ്ററിന്റെ ഉപയോഗവും വാടക കരാറും ഉൾപ്പെടെയുള്ള കാര്യങ്ങൾ പോലീസ് ആസ്ഥാനത്തെ രഹസ്യാത്മക വിഭാഗത്തിന്റെ കീഴിൽ വരുന്നതാണെന്നും, ഈ വിഭാഗത്തെ ആർടിഐ നിയമത്തിന്റെ പരിധിയിൽ നിന്ന് ഒഴിവാക്കിയിട്ടുണ്ടെന്നുമാണ് ഔദ്യോഗിക വിശദീകരണം.

ഹെലികോപ്റ്റർ എന്ന് വാടകയ്‌ക്കെടുത്തു, പ്രതിമാസ വാടകത്തുക, കരാർ കാലാവധി, ഹെലികോപ്റ്റർ നൽകിയ കമ്പനി ഏതാണ്, ജൂലൈ 31 വരെ നൽകിയ ആകെ തുക എത്ര തുടങ്ങിയ സുപ്രധാന വിവരങ്ങളാണ് അപേക്ഷകൻ ചോദിച്ചിരുന്നത്. ഇതിനൊപ്പം വാടക കരാറിന്റെ പകർപ്പും ആവശ്യപ്പെട്ടിരുന്നു. എന്നാൽ പോലീസ് ആസ്ഥാനത്തെ സ്റ്റേറ്റ് പബ്ലിക് ഇൻഫർമേഷൻ ഓഫീസർ നൽകിയ മറുപടിയിൽ, രഹസ്യാത്മക വിഭാഗത്തിന് (Confidential Section) ലഭിച്ചിട്ടുള്ള ഇളവ് ചൂണ്ടിക്കാട്ടി ഈ വിവരങ്ങൾ കൈമാറാൻ നിർവാഹമില്ലെന്ന് വ്യക്തമാക്കുകയായിരുന്നു. മുഖ്യമന്ത്രിയുടെ ഹെലികോപ്റ്റർ യാത്രകൾ പ്രതിപക്ഷം വൻ വിവാദമാക്കിയ പശ്ചാത്തലത്തിലാണ് വിവരങ്ങൾ ആവശ്യപ്പെട്ട് ആർടിഐ അപേക്ഷ നൽകിയത്. മുഖ്യമന്ത്രി ഹെലികോപ്റ്റർ സ്വകാര്യ ആവശ്യങ്ങൾക്കായി ഉപയോഗിച്ചെന്നായിരുന്നു പ്രതിപക്ഷത്തിന്റെ പ്രധാന ആരോപണം.