സംഗീതം ഒരുക്കാൻ ഇളയരാജ: വിജയ് സേതുപതിക്കായി പാടാൻ ധനുഷ്; ആരാധകർക്ക് ആവേശമായി വെട്രിമാരന്റെ ‘വിടുതലൈ’

തെന്നിന്ത്യൻ സൂപ്പർ താരം വിജയ് സേതുപതിയെ നായകനാക്കി വെട്രിമാരന്‍ സംവിധാനം ചെയ്യുന്ന ‘വിടുതലൈ’യില്‍ ഗായകനായി ധനുഷ് എത്തുന്നു. ചിത്രത്തിന്റെ സംഗീതം ഇളയരാജയാണ് ഒരുക്കുന്നത്. മാത്രമല്ല ഇളയാരാജയുടെ കടുത്ത ആരാധകനായ ധനുഷ് അദ്ദേഹത്തിന്റെ സംഗീതസംവിധാനത്തില്‍ ആദ്യമായ് പാടുന്നു എന്ന പ്രത്യേകതയും പാട്ടിനുണ്ട്. കൂടാതെ വെട്രിമാരന്‍ ചിത്രത്തിനു വേണ്ടിയാണ് ഇളയരാജ ഈണമൊരുക്കുന്നത്.

ധനുഷ് സ്വന്തം ചിത്രത്തിനു വേണ്ടി നിരവധി തവണ ഗാനം ആലപിച്ചിട്ടുണ്ടെങ്കിലും മറ്റൊരു നായകനു വേണ്ടി ആദ്യമായാണു പാടുന്നത്. മെലഡി ഗാനമാണ് ‘വിടുതലൈ’ക്കു വേണ്ടി ധനുഷിന്റെ ശബ്ദത്തില്‍ പുറത്തു വരുന്നതെന്നാണ് അണിയറപ്രവര്‍ത്തകര്‍ നല്‍കുന്ന സൂചന. ചിത്രത്തിലെ നിര്‍ണായക ഘട്ടത്തില്‍ വരുന്ന പാട്ടാണിത്.

അതേസമയം സൂരിയും വിജയ് സേതുപതിക്കൊപ്പം പ്രധാന വേഷത്തിലെത്തുന്ന ചിത്രമാണ് ‘വിടുതലൈ’. ജയമോഹന്റെ ‘തുണൈവന്‍’ എന്ന ചെറുകഥയെ ആസ്പദമാക്കിയാണ് സിനിമ ഒരുക്കുന്നത്. ‘വടചെന്നൈ’, ‘അസുരന്‍’ എന്നീ ചിത്രങ്ങള്‍ക്കു ശേഷം വെട്രിമാരന്‍ സംവിധാനം ചെയ്യുന്ന ചിത്രം കൂടിയാണ് ‘വിടുതലൈ’.